Shillong, Jymmang 12
Ka shlem treikam u District Sports Officer (DSO) East Khasi Hills kan pynlong ïa ka District Level Inter School Subroto Cup Football Tournament, 2025 na ka bynta ki skul kiba hap hapoh kane ka district naduh ka 2 tarik u Jylliew mynta u snem.
Ïa kane ka lympung la phiah sha lai tylli ki kyrdan ïalehkai, kata ka Under-15 jong ki shynrang, katba ka Under-17 jong ki kynthei bad shynrang. Te kumta kane ka shlem treikam ka la kyntu ïa ki skul ba kin leit shim ïa ki form ha ka por long trei.
Ki khynnah kiba lah ban shim bynta ka Sub-Junior (Under-15) ki dei ban long kiba la kha ha lane hadien ka 15 tarik u Kyllalyngkot 2011. Katba ki khynnah kiba lah ban shim bynta ha ka Junior (Under-17) ki dei ban long kiba la kha ha lane hadien ka 1 tarik u Kyllalyngkot u 2009.
Ka tarik kaba khatduh ban pynpoi ïa ki form kan dei ban long ha ka 23 tarik mynta u bnai ha katei ka shlem treikam ha ka por long trei bad ka jingkhmih bniah ïa ki rta ki khynnah (screening) kan long ha ka 28 tarik. Te kumta la kyntu ïa ki khynnah ba ki dei ban wanrah lang ïa ki kot ki sla ban pynshisha ïa ka snem kha (Original Birth Certificate) bad ka Adhaar Card.
Ïa kijingtip ba bniah ki lah ban phone ha kine number 8974606849 (Under -15), 6909146669 (Under-17 Boys) bad 9774096821 (Under-17 Girls).
