Mairang, Jymmang 12
Ka Shad Suk Mynsiem kaba lai sngi jong ka Seng Khasi Eastern West Khasi Hills District ka la poi noh sha kaba kut hapdeng ka iphuh-iphieng lyngba ka jingsakhi bad ïa shim bynta jong spah ngut ki samla kynthei bad shynrang lem bad ki hep barit ha ka 12 tarik mynta u bnai ba la pynlong ha madan Dom Mawlum Pyndengumïong, Mairang.
Ha kane ka sngi pynkut ïa kane ka shad suk mynsiem, ha shwa ban leit sha madan shad, ka la don shwa ka jingkren bad ka duwai ka phirat ha phyllaw jong ka ïing Seng Khasi ha Pyndengumïong bad la bud sa ka jingïaid paidbah ha ryngkat ka jingshad pyni riti na ïing seng Khasi shaduh madan Dom Mawlum.
Nangta, ha kane ka sngi ki nongïalam ka Seng Khasi EWKHD ki la ïoh lad ban pyndep ïa kane ka jingshad ainguh aidem kaba shisien shisnem hapdeng ka iphuh- iphieng ha kaba ki nongshad kynthei bad shynrang shriak ha la ka rim ka beit tynrai ryngkat ka jingdeng bad kieng ïa ki mar ksiar ki mar rupa, kiba shat phyrnai ban pynphuh-pynphieng ïa ka lympung shad hi baroh kawei.
Lah ban kdew hangne ba ïa kane ka shad suk mynsiem jong ka Seng Khasi Eastern West Khasi Hills District la sdang naduh ka sngi Saitjaiñ jong ka taïew ba la dep ka 10 tarik u Jymmang 2025. Kane ka dei ruh ka sien kaba saw ïa ka Seng Khasi Eastern West Khasi Hills District ban pynlong ïa kane ka shad ka kmen.
