Shillong, Jymmang 12
Ka Seng Samla Mawlai Phudmuri ka la jam sha ka final jong ka Inter Dong Under-15 bad Under-17, hadien ba ki la ïoh jingjop ha ka jingïakhun semi-final kaba la long ha ka sngi Saitjaiñ ha madan Heh Mini Stadium, Mawlai Phudmuri.
Kiwei ar tylli pat kiba la ïoh rung sha ka final ki long ka Seng Samla Mawlai Motsyiar ha ka Under-15 bad ka Seng Samla Mawlai Nonglum ha ka Under-17.
Haba phai sha kane ka Inter Dong ba la pynïaid da ka Mawlai Sports Club, ha ki jingïakhun semi-final jong ka Under-15, ka SS Phudmuri ka la pynliem noh ïa ka Seng Samla Mawlai Ïewrynghep da 3-0 kol bad ka Seng Samla Mawlai Motsyiar ka la jop ïa ka Seng Samla Mawlai Nongkwar da 4-0 kol.
Ha ki jingïakhun semi-final jong ka Under-17 pat ka SS Phudmuri ka la jop da 6-1 kol pyrshah ïa ka Seng Samla Mawlai Mawroh bad ka Seng Samla Mawlai Nonglum ka la jop ïa ka Seng Samla Mawlai Kyntonmassar da 2-1 kol.
Te kumta ka SS Phudmuri kan ïakhun final ïa ka SS Motsyiar ha ka Under-15 bad pyrshah ïa ka SS Nonglum ha ka Under-17 kaba la thmu ban pynlong ha ka 17 tarik (sngi Saitjaiñ).
Ha katei ka jingïakhun semi-final la sakhi da u Bah L. Garod, Deputy Commissioner ka West Khasi Hills District bad u Bah Tirot Sing Sun kiba la sam ïa ki khusnam sha ki khynnah ïalehkai kiba kynsai ha ka U-15. Katba u Bah Hering Shangpliang, Head Coach ka Mawlai SC bad u Bah Pynsuklang Hynñiewta Official ka Mawlai SC pat ki la sam ïa ka khusnam sha ki khynnah ïalehkai ba kynsai ha ka U-17.
