New Delhi, Jymmang 12 (UNI)
Ka India ha ka Lah Sngi U Blei ka la ong ba ka ‘Operation Sindoor’ ka long ka jingjop ba pura bad ka la lah ban pynurlong ïa ki jingthmu ba la angnud – ka jingjulor kaba jur jong ka tnad ïada suiñ ka Pakistan, kynthup ïa ki namding ba la shna da ka Turkiye lem bad ki tiar ïada bapher-bapher kiba la pynïeng.
U Air Marshal A.K. Bharti u la ong ba katba ki jingtei shipai ka Pakistan ki la shah pynjulor ha ki jingshah thombor na suiñ, ki ktem liengsuiñ ka India ki ïai bteng ban treikam bad long kiba la khreh ban hiar thma pyrshah ïa kano-kano ka jingleh bymman jong ka Pakistan.
Haba ai jingkren ha ka jingïalang bad ki nongthoh khubor, u Director General Air Operations, Air Marshal A.K. Bharti ryngkat u Director General Military Operations, Lt. Gen. Rajiv Ghai bad u Director General Naval Operations, Vice Admiral A.N. Pramod u la ong, “Baroh ki ktem shipai jong ngi, baroh ki jingtreikam jong ngi ki ïai bteng ban treikam pura bad long kiba la khreh ban ïaid shakhmat bad kino-kino ki jingthmu hadien-habud, lada dei ba donkam.”
U Air Marshal Bharti u la ong ba ka jingïakhun jong ka India ka long pyrshah ïa ki lehnoh bad ki jingtei ba kyrshan ïa ki, bad ym pyrshah ïa ki shipai ne ki ‘riew paidbah.
“Hynrei ka long kaba sngewsih ba ki shipai Pakistan ki la jied ban ïakhun,” u la ong.
Haba ai ïa ki jingtip ba bniah halor ka jingjop jong ka ‘Operation Sindoor’, u Air Marshal u la ong ba ka tnad ïada ri jong ka India ym tang ba ka la khanglad ïa ki ‘namding bad ki ‘drone’ ka Pakistan hynrei ka lah ruh ban pynpra ïa ki, kaba pyni shai ïa ka jinglah pura jong ka India ban ïada ha ka rukom kaba tbit ïa kaba la pynshisha ha ka jingïakhun.
U la ong ruh ba bun bah ki ‘drone’ bad ki Unmanned (combat) Aerial Vehicle ba la pyndonkam da ka Pakistan ki la shah khang lad noh ha ki tiar ‘UAS’ bad ha ki shipai suiñ ka ri kiba la pyntbit bha.
U Director General of Military Operations (DGMO), u Lt. Gen. Rajiv Ghai u la ong ba namarba ki jinghiar thma ba thik-pa-thik jong ka India ïa ki lehnoh ki la ïaid shakhmat khlem da tam ïa u pud u sam LoC bad khappud bar-ri, “ngi la antad ba ka Pakistan ruh kan jubab kumjuh. Kumta, ngi la pynkhreh lypa ïa ka jingïada suiñ jong ngi”.
Ki tiar ïaleh ‘Counter-Unmanned Aerial System’, ki tiar ïaleh thma ‘electronic’, bad ki tiar ïada suiñ kiba la kynthup ha ka thup, ki long kiba la pynïasoh kyrpang bad ki tiar kiba ïadei dur jong ki tnad shipai suiñ ka India, u la ong.
Haba bynrap lang halor kane ka bynta, u Vice Admiral, u A.N. Pramod u la ong ba ka Navy ka dang peitngor miet la bad sngi ïa ki jaka kiba lah ban don ka jingma.
“Ngi la pyndonkam hok ïa ki ‘sensor’ ba bun jait bad ki jinglum jingtip kumjuh ban pynneh ïa ka jingpeitngor kaba ïai bteng ban pynduna ne pynduh shi syndon ïa ki jingma katba ki mih,” u la ong.
Ka India ka la pynbit pynbiang ïa ka rukom ïada suiñ kaba bun syrtap, kaba kynthup ïa ki ‘radar’ bad ki kor peitngor. Ïa kine baroh la pynlong hapoh ka jingpynïaid jong ka rukom treikam ïada kaba pura.
