Jowai, Jymmang 12
Ka Trained Nurse Association of India (TNAI), West Jaiñtia Hills ha ka 12 tarik Jymmang ka la rakhe ïa ka sngi jong ki Nurse ha Northeast Adventist University, Khliehtyrshi halor ka phang, “Our Nurses, Our Future: Caring for Nurses strengthen economies.”
Ïa ka jingrakhe la sdang da ka jingthang ïa ka sharak ha ka jingdonlang ka Kong Darry Gretta Kharshiing, Chief Judicial Magistrate, u Dr. Heimonmi Niang, Block Development Officer, Thadlaskeiñ, ka Kong Larista Dohling, Principal School of Nursing Pahamsyiem, Nongpoh bad General Secretary TNAI, Megha-laya State Branch nalor kiwei kiwei.
Ka Kong Darry Gretta Kharshiing ha ka jingkren ka la ai khublei ïa ka kynhun jong ki nos na ka bynta ka jingaiti bad ka jingnoh synñiang kaba kordor sha ka tnat ka koit ka khiah bad ka imlang sahlang.
Ki nos ym tang ba ki ai ïa ka jingsumar hynrei ki don ruh ka bynta kaba kongsan ha kaba pynkhlaiñ ïa ka ïoh ka kot bad ki dei hok ban ïoh ïa ka jingithuh bad ka jingkyrshan na ka bynta ka jingbha jingmiat jong ki.
Ka Kong Suzy Lewis Chen, Vice Principal School of Nursing Dr. Norman Tunnel Hospital, Jowai ha ka jingkren ka la ban jur ïa ka bynta ba donkam eh jong ki nos ha ka liang ka koit ka khiah. Ki nos kim dei tang ki nongsumar hynrei ki dei ruh u mawjam ha kaba ka koit ka khiah ka ïeng. Ka Nurses Association of India ka la sam ïa ki jingai sngewbha sha ki nos kiba la shongthait kum ka jingithuh ïa ka jingshakri bad jingaiti lut jong ki.
Shwa kane, la ïoh ka jingkren pdiang burom na ka Kong Bailinda Dkhar, Principal cum Associate Professor ka NEACON bad ka jingkren khublei na ka Kong Lubih Kyndiah, Nursing Superintendent Jowai Civil Hospital Ialong ha ka jingïalang kaba la pynïaid da ka Kong Phiralyn Kharkongor, Assistant Professor NEACON.
