Shillong, Jymmang 12
Wat la ka la don ka jingkiew arshah jong ka bai bording bad kumjuh ruh ka jingkynnoh ba la sniew u meter, hynrei na ka liang jong ki bor ba dei khmih ka MeECL kim shym la ai satia ka jingpynshai sha ki Nongïalam shnong.
Ha kaba ïadei bad kane, u Rangbah Shnong ka Dymmiew, Bah Manphyrnai Marbaniang haba pynpaw ïa ka jingsngewkhia, u la ïathuh ba naduh u bnai Kyllalyngkot, 2025, ka la don kynsan ka jingkiew kaba long arshah jong ka bai thang bording bad mar-mar halor kane u la pan jingpynshai hynrei kat haduh mynta ym shym la ïoh satia ka jingpynshai lait noh tang ka jingpynpaw ba dei na ka jingsniew jong u meter, ha kaba ym shym la ïathuh ne pynshai pat halor u meter.
“Nga la dep ban phah da ka jingthoh sha u Assistant Executive Engineer ka Mawprem Distribution Division, Shillong ban pan jingpynshai halor kane, hynrei haduh mynta ngam shym la ïoh jingshai, ba na kiei ki daw ba ka la don ka jingkiew dor arshah,” la ong u Bah Manphyrnai.
U Bah Manphyrnai u la ong ba u la dep ban pan jingpynshai halor ka jingbym meh ki ‘street light’ jong ka MeECL kiba don ha shnong Dymmiew bad halor ka jingkiew arshah ka bai bording na u bnai ba la dep, hynrei ki bor ba dei peit kim shym la ai jingpynshai.
“Man u snem, ki nongshong shnong ki siew beit ïa ka khajna, bad ki jingsiew kiba ki dei ban siew, hynrei kaba sngewsih pat ka long ba ka jingshakri kaba ki ïoh, kam biang satia naduh ka umbam umdih, ki street light bad kiwei kiwei,” u la ong.
“Naduh ka 24 tarik Kyllalyngkot, 2025, ngi la leit pan jingpynshai ha kaba ïadei bad ka jingbym meh ki ‘street light’ hapoh shnong bad ruh ka jingkiew arshah ka bai thang bording na ki bor ba dei khmih, hynrei ngi khlem ïoh jingpynshai eiei. Kaba sngewsih pat ka long ba ha ka 8 tarik mynta u bnai, la ïoh da ka bill light kaba thoh, ba dei ban siew noh mardor ban lait na ka jingshah ot bording. Kumta na ka liang ka Dorbar Shnong Dymmiew, ngi kyrpad ïa ki bor bahalor ba kin ai jingpynshai halor kane,” la ong u Rangbah Shnong ka Dymmiew.
