Shillong, Jymmang 12
Uwei u runar bym lah ban ithuh, u la knieh ïa ka mobile phone na kti jong kawei ka samla bad ban phet bak hadien ba u la pyrshang rung jubor hapoh ka ïing jong ka.
Katkum ka khubor kaba la ïoh na ki pulit la ong ba ka Soni Kumari ka la ai ka jingujor ba ha ka por mynsngi jong ka 5 tarik mynta u bnai, uwei u runar bym lah ban ithuh, u la leit sha ka jaka sah jong ka kaba don ha RR Colony, Rynjah, Shillong, bad u la pyrshang ban rung jubor shapoh ka jaka sah jong ka bad ruh ban knieh ïa ka mobile phone bad phet noh bak.
Ha kawei pat ka khubor, u Jordan Rem u la ujor ba ha ka 4 tarik mynta u bnai, ha ka por shiteng miet, u la don hapdeng ka jingbym tip briew shuh ha Fourth Furlong, Polo, Shillong.
Hynrei ha ka por mynstep jong ka 5 tarik kata ha ka por kumba 8.10 eiei, u la lap ba ka mobile phone bad ka bek pisa jong u, kaba don kumba T.9,000/- lem bad ki kot ki sla kiba donkam, ki la jah lut. Kham hadien, haba la peit na ka kor CCTV jong ka dukan ka jong u, kaba don ha Fourth Furlong, Polo, Shillong, la lap ba ha ka por kumba 5.07 dang step, katba u dang don hapdeng ka jingbym tip briew, uwei u briew bym lah ban ithuh, u la shim ïa ki tiar ki tar ki jong u.
