Shillong, Jymmang 12
U MLA ka Liang Pyrshah uba dei u President ka Voice of the People Party (VPP), Bah Ardent M Basaïawmoit u la ong ba lada ka Sorkar ka sngew ba ka donkam palat ïa ka lynti, ka lah ban ïaid shakhmat.
“Lada ka Sorkar ka sngew ba ka donkam palat ïa ka lynti, ka lah ban ïaid shakhmat, balei donkam ban thaw ïa kata ka komiti namar ka seng ka la dep kren shai halor kane ka bynta,” u la ong.
Haba pynskhem ïa ka jingbym treh leit ïashim bynta ha ka All Party Committee (APC) kaba la thaw da ka Sorkar ban ïasyllok ha kaba ïadei bad ka jingpynïasoh lynti rel ha ka Jylla, u MLA ka Liang Pyrshah u la ong ba ka seng ka la dep sngewthuh lypa ïa ka sur jong u paidbah halor kane ka bynta, bad kawei pat ka dei namar ba ka seng ka la ju kren ïa kane ka mat wat hapoh ka ïingdorbar thaw aiñ ruh.
“Hangno donkam ïa kane ka komiti ban pynïasoh lynti rel, ka Sorkar ka tip bha ïa ka jingpyrkhat ki paidbah. Ngi la kren shai ruh hapoh ka ïingdorbar ba ngi kwah ban ïohi ba ka Sorkar kan wanrah ïa ki lad ïada na ka jingwanrung ki briew na shabar. Ngim ïohi ïa ka jingdonkam wat ban don kane ka komiti,” la ong u Bah Ardent.
Lah ban kdew ba ka Voice of the People Party (VPP) ha u Ïaïong ka la pynbna ba kan ym treh ban leit ïashim bynta ha ka All Party Committee (APC) ba la thaw da ka Sorkar ban ïathir halor ka jingpynïasoh lynti ha ka thaiñ Khasi-Jaiñtia, da kaba pynpaw ba kam don jingmut lada khlem wanrah shwa ïa ki aiñ ban tehlakam ïa ka jingwan rung ki briew nabar Jylla, kum ka Inner Line Permit (ILP), khnang ban ïada ïa ki trai shnong.
Na ka liang ka VPP ka la ong ruh ba ka jingthaw jong ka Sorkar ïa ka APC ka long tang ka jingpynsyrwa kai ïa ka por, bad ka seng kan ym treh ban ïashim bynta.
Hadien ka jingkyntait jong ka VPP, sa ka Meghalaya Pradesh Congress Committee (MPCC), ha ka taïew ba la dep ka la pynbna ba kan ym treh ban don bynta ha ka APC, da kaba pynpaw ba ka Sorkar ka khlem thaw ïa ka All Party Committee na ka bynta kiba bun ki kam ba kongsan ba ïadei ha ka Jylla, hynrei ka la shu rai marwei.
