Shillong, Jymmang 12
Ka Deputy Commi-ssioner (DC) jong ka East Khasi Hills ka Kong RM Kurbah ka la pynshlur ïa ki samla ba kin rungkam shipai ka Ri India, da kaba pynbna ruh ïa ka jingsdang jong ka Free Coaching Camp (FCC) ka ban ïarap ïa ki ba kin pass ïa ki test bapher bapher.
“Ngi kwah ban pynshlur ïa ki samla ka jylla ba kin rung sha ka kam shipai ka Ri India. Ngi kyrpad ïa ki ba kin register bad ka ophis jong ngi namar ngin sa pynlong ïa ka free coaching camp ba 30 haduh 45 sngi,” la ong ka DC haba kren sha ki lad pathai khubor ha ka Lah Sngi U Blei.
Shuh shuh na ka liang jong ka DC ka la pyntip ba ka ophis jong ka, ka la ïohpdiang ïa ki aplike-shon na 40 ngut ki samla kiba kwah ban wan sha kane ka coaching camp.
Ha kawei pat ka liang, u ADC Bah Shanborlang Warjri u la ong ba ka jingthmu jong ki bor District ban ai ïa kane ka pre-recruitment cum training ka long ban pynkotbor ïa ki samla kiba ïakhun ïa ka Common Entrance Exam (CEE) ban sa wan, ba kin don ïa ki jingtip, ki sap bad ka rukom ïakhun ïa ka eksamin. U Bah Warjri u la ong, “Ki samla jong ngi ki dei kiba biang ha ka met ka phad-ki lah beit ban pass ïa ka physical fitness, hynrei ban pass ïa ka eksamin, bun na ki samla khamtam kiba na ki jaka nongkyndong kim don satia ïa ki jingtip lane kumno ban ïakhun, kumta lyngba kane ka prokram, ngin sa ai ïa ki jinghikai bad ai ruh ïa ki syllabus na ka bynta ka eksamin bad ngin sa ïarap ruh ïa ki ba kin jubab ïa ki jingkylli jong ki eksamin ba la dep khnang ba kin tip ïa ki syllabus bad tip kumno ruh ban jubab naba kane kan ïarap ba kin ïoh ïa ka percentage kaba heh.”
Ha kawei pat ka liang, u Bah Warjri u la pyntip ba ha u snem 2023 la sdang ïa ka free coaching programme, ha kaba la jied bad ai jinghikai ïa ki 200 ngut bad na kine, 82 ngut ki la pass ïa ka CEE bad ha kaba khatduh na ki 82 ngut, 35 ngut ki la ïoh ïa ka kam bad pass ïa ka physical fitness eksamin”.
“Ngi kwah ban pynshlur ïa ki ba kin wan sha ka ophis DC ha ka kamra 319, ngi kyntu ïa ki ban wan ha shuwa ka 15 tarik Jymmang khnang ba ngin lah ban btin lynti ïa ki khnang ba kin pass ïa ka eksamin CEE ka ban long ha ka taïew ba khatduh u bnai Jylliew lane ka taïew ba nyngkong u Naitung. Ka jingai jinghikai kan long 30 haduh 45 sngi bad hapdeng kane ka por, kin sa ïoh ïa ki jingïarap kaba ki donkam,” u la ong.
