Shillong, Jymmang 12
U President ka Voice of the People Party (VPP) uba dei ruh u MLA ka Nongkrem Konstitwensi, Bah Ardent M Basaïaw-moit u la ong ba ka jingïaleh jong ka seng na ka bynta ban pynkylla ïa ka Sorkar ba mynta ha ka jylla kam pat kut hynrei ka dei tang ka jingsdang.
Haba kren halor ka jingïaid lynti ka VPP, u Bah Ardent u la ong ba naduh ba la seng ïa ka VPP ha kine ki 3 snem, ka seng ka la ïoh shibun ki mawjam kiba khraw, kata ka jingshah jied jong u Dr. Ricky Syng-kon ban mihkhmat hapoh ka dorbar Parlia-ment, ka jingïoh ban thaw marwei ïa ka executive committee hapoh ka Khasi Hills Autono-mous District Council, ka jingïoh haduh 8 ngut ki MDC hapoh ka Jaiñtia Hills Autonomous District Council bad ka jingjop jong 4 ngut ki MLA hapoh ïingdorbar thawaiñ ka Jylla.
U Bah Ardent u la ban jur ba kum u President ka VPP u hap ban khmih ruh shabar ka konstitwensi, na ka bynta ka jingdonkam ha ka jylla baroh kawei ban pynkhlaiñ bad pynjlan shuh shuh ïa ka jingsynshar jong ka VPP.
“Na ka bynta ban wan ha ka bor ha u snem 2028, nga hap ban pynlut por lang ruh shabar ka konstitwensi,” u la bynrap.
Ïa kane u la kren ha ka ïingsah jong u ha Nongkrem ha ka jingïalang na ka bynta ban sam ïa ka jingmyntoi hapoh ka skhim Special Rural Works Programme (SRWP) ne ka MLA skhim na ka bynta ka mang tyngka jong u snem 2024-25.
U Bah Ardent u la ong ruh ba ka jingrung jong u sha ka kam saiñ pyrthei ka dei ka jingthmu kaba ïar na ka bynta ban shakri ïa ki paidbah jong ka jylla baroh kawei ym tang na ka bynta ki paidbah ka konstitwensi.
“Lada ka jingthmu jong nga ka kut noh tang ban shakri tang ïa ka Nongkrem Konstitwensi, ngan nym ïakhun ïa ka ilekshon,” u la ong.
Na ka skhim SRWP kaba ju tip kum ka MLA scheme ryngkat ka mang tyngka kaba T.2.50 klur, u Bah Ardent u la mang ïa ka jingïarap pisa na ka bynta ban shna ïa ki ïing bad ban kyrshan ïa ki nongrep bad ïa ki nongkhaïi kiba rit.
Nalor kane u la ai jingïarap ruh ïa ki skul, ki kolej, ki jaka ïalehkai bad ki jaka thang metïap.
