Shillong, Jymmang 12
U Myntri ba khmih ïa ka tnat Pule-Puthi ha ka Jylla, Rakkam A Sangma u la ïathuh ba ka tnat ka la pynher shithi sha ka tnat Pynroi Sor ban kyrpad ai jaka na ka bynta ban buh ïa ka campus jong ka Captain Williamson Sangma State University ha Shillong.
Haba ïakren bad ki lad pathai khubor ha ka Lah Sngi U Blei, u Rakkam u la pyntip ruh ba ïa mynta kam don jingeh eiei namar ba ki kolej kiba la rai ban pynïasoh bad ka skulbah jong ka Jylla ki la sdang ban pynrung kyrteng ïa ki samla pule, bad ka jingpynkhreh ka la biang nadong-shadong.
U Myntri u la ong ba ka tnat ka dang ap ïa ka jaka ba paka ban buh ïa ka Shillong Campus ba pura, ha kaba u la pyntip ba mynta ki kam ki la ïaid ban ithuh shwa ïa ka shlem treikam ba shipor jong ka Shillong Campus.
Katkum ka jingïathuh u Myntri, ka jingthmu ban wanrah ïa ka Shillong Campus jong ka Captain Williamson Sangma State University ka la ïakynduh mawsiang, hadien ba ka jaka ba la thmu ban buh kaba dei ha Bijni Complex ka don hapdeng ka jingïakhun mukotduma ha ïingbishar namar ka jingïaknieh long trai.
U la ong ba ka NEHU ka la leit sha High Court ban pynksan ïalade ba ka dei ka trai ba shisha jong ka Bijni complex naduh ba la tei ïa ka, bad bynrap ba kane ka kam mynta ka don hapoh ka ïingbishar.
Haba kylli, u Rakkam u la ong ba ka NEHU ka la kam ba ka dei trai ïa ka Bijni Complex, bad ka Sorkar Jylla ruh ka la kam trai ïa katei kajuh ka jaka. Ka NEHU ka la tynjuh ïa ka jinglong trai da kaba leit sha ïingbishar.
“Ha ka jingshisha ngi thmu ban pyndonkam ïa ka Bijni Complex ha Laitumkhrah, hynrei ka NEHU ka la rah ïa kane ka kam sha High Court halor ka jinglong trai jong ka, namar ka Sorkar ruh ka kam trai ïa katei kajuh ka jaka. Ai ba ka ïingbishar kan rai shwa ïa kane ka kam,” la ong u Rakkam. Namar kane ka jingdon mukotduma, u Myntri u la ïathuh ba na ka liang ka Sorkar ka la sdang ban peit noh sha kiwei ki jaka tang ban buh shipor ïa ka campus bad wad ruh ïa ka jaka ban long trai hi da ka Sorkar ban shna ïa ka campus ha Shillong.
