Shillong, Jymmang 12
Ka lympung ïalehkai U-15 Girls North East Rising Cup 2025 kan sdang ha ka Sngi Ba-ar bad ka Meghalaya Cricket Association (MCA) ha ka Lah Sngi U Blei ka la pynbna ïa ka kynhun jong 15 ngut ki ‘thei ïalehkai ban pynkhreh na ka bynta kane ka lympung.
Ki la don 20 ngut ki nongïalehkai ba la shah jied lyngba ki zonal camp ha Shillong bad Tura shwa ban ïa lum ha Nongkhrah, Ri-Bhoi, ha kaba la pynlong ïa ka jingjied khatduh ban pynkhreh ïa ka kynhun.
Kane ka lympung ïalehkai ka thmu ban kyntiew ïa ka jingïalehkai kriket jong ki kynthei naduh ba ki dangrit na kane ka thaiñ shatei lammihngi ka dei ka jingshim khia jong ka Assam Cricket Association bad yn pynlong ïa kane ka lympung ha Guwahati.
Ïa ki phra tylli ki kynhun ki ban ïashim bynta la phiah sha ar tylli ki group. Ka Meghalaya ka don ha ka Group-B lem ka Tripura, Sikkim bad ka Mizoram. Katba ka Assam, Arunachal Pradesh, Manipur bad Nagaland ki don ha ka Group-A.
Ki ‘thei ïalehkai ka Jylla ki long ka Namesha A Marak (C), Laviola Mary Lyngdoh (VC), Prisceca Nongpiur (WK), Naridashisha Marngar (WK), Phibanylla Tongwah, Lawanjingkyrmen Lyngkhoi, Badphishyrta L Nonglait, Avianna Myrthong, Alvarine Shullai, Anuradha Gurung, Iarikmen Kharbteng, Onasa M Sangma, Sonakshi R Marak, Charkisha M Momin & Aniesha Arengh. Katba kiwei kiba la pynap lypa ki long ka Dajanai L Nonglait, Idatyngkai Marngar, Saramanbha Khongsti, Nokgam N Marak & Bianchimik R Sangma.
Ki nongïarap jong ka kynhun ki long u Shankar Newar (head coach), Surooj Rabah (assistant coach), Sweetie Marboh (trainer), Jakrimbal D Arengh (physio) & Phibakordor Diengdoh (manager).
