Shillong, Jymmang 12
U Virat Kohli u la rai ban shongthait noh na ka jingïalehkai Test bad kane ka la wan hadien ba u la ïoh 9230 ron na 123 tylli ki jingïalehkai.
“Ka la long 14 snem naduh ba nga la phong nyngkong eh ïa ka sopti rong jngum ha ka jingïalehkai Test. Hooid, ngam shym la mutdur ïa ka jingïaid lynti kaba kane kan ïalam ïa nga. Ka la tynjuh ïa nga, ka la pynwan dur ïa nga, bad ka la hikai ïa nga ïa ki jinghikai kiba ngan rah ha ka jingim jong nga,” ong u Kohli ha ka jingthoh jong u ha ka Instagram.
“Katba nga nangïaid jngai na kane ka rukom, kam long kaba suk, hynrei ka sngew dei. Nga la ai ïa kaei kaba nga don, bad ka la ai biang ïa nga shibun kiei-kiei kiba nga lah ban kyrmen.”
“Nga ïaid noh da ka dohnud kaba dap da ka jingsngewnguh na ka bynta ka jingïalehkai, na ka bynta ki paidbah nongkyrshan, bad na ka bynta uwei-pa-uwei u briew uba la pynlong ïa nga ba ngan ïohi ïa ka lynti,” u la bynrap.
U Kohli u la ïalehkai nyngkong ha ka Test pyrshah ïa ka West Indies ha u snem 2011, bad hadien lai snem u la shimti pat kum kapten ïa ka kynhun. U la lamkhmat ïa ka ri ha ki 68 tylli ki jingïalehkai Test, ha kaba ka India ka la shah rem tang 17 sien. Te kumta ka India ka la jop 40 sien bad ïakhaid 11 sien.
Hapoh ka jingïalam u Kohli, ka India ka la jop ïa ka series ha Australia ha ka sien kaba nyngkong ha u snem 2019. Ka Test kaba khatduh jong u ka long ruh ha Australia (Sydney), ha ka Border-Gavaskar Trophy.
U Kohli u la shongthait na ka T20Is hadien ba ka India ka la jop ha ka T20 World Cup 2024.
Kane ka rai jong u ka la wan hadien ka jingpynbna dangshen da u Rohit Sharma ban shongthait na ka jingïalehkai Test, te kumta yn shimti noh mynta da u Shubman Gill ïa ka kynhun ïalehkai ka ri.
