Shillong, Jymmang 12
Ka Hynñiewtrep Integrated Territorial Organisation (HITO) Narpuh Circle ha ka 8 tarik Jymmang, 2025 ka la leit ban ïakynduh ïa ki trai jong ki karkhana pynmih dewbilat kiba don hapoh ka Elaka Narpuh haba ïadei bad ka jingkyrpad ban thep kam thep jam ïa ki samla katei ka thaiñ ha ki karkhana.
Ki karkhana ba la leit ban pynher shithi ki kynthup ïa ka Hills Cement Company Limited kaba don ha Mynkre East Jaiñtia Hills, ka Topcem Cement Meghalaya Cement Limited kaba don ha Chiehruphi, ka JUD Cement Limited kaba don ha Wahïajer, ka Dalmia Cement Bharat Limited kaba don ha Thangskai bad ka Star Cement Limited kaba don ha Lumshnong.
Ka seng ka la ong ba katkum ka shithi ba la phah sha ki trai jong kitei ki karkhana, ka long ba ki dei ban ai ki lad kamai na ka bynta uwei u briew shimet na ki lai tylli ki shnong ba la kdew manla u snem ha kaba na ka bynta u snem 2025-26, ka seng ka la ai jingmut ban thung uwei u briew na Tongseng, uwei na Umstain, bad uwei na Sonapur.
Da kaba bud ïa kane ka rukom, na ka bynta u snem 2026-27, ka seng ka la ai jingmut ïa kawei-kawei ka lad ai kam ai jam na ka bynta kawei-pa-kawei ka shnong ha Sakhri, Myrli, Shymplong, Kuliang, Borsara, Pyrtakuna, Umkiang, Dona Umbluh, Dona Skur, Dona Bhoi, Wahkoh, Ratacherra.
“Ngi dawa ba kitei ki kompani ki dei ban ai ki lad kamai na ka bynta uwei u briew shimet na ki lai tylli ki shnong ba la kdew manla u snem. Kum ka nuksa, na ka bynta u snem 2025-26, ngi ai jingmut ban thung uwei u briew na Tongseng, uwei na Umstain, bad uwei na Sonapur,” ong ka seng.
Na ka liang kitei ki karkhana ki la ong ba ki ju ïai thep kam beit hi ïa ki samla ka Elaka manla u snem. Kumta khnang ban lap ïa ka jingshisha halor kane, ka seng ka la pan da ki kyrteng jong kitei ki samla kiba trei ha kitei ki karkhana bad ka la aipor hapoh ka shibnai ïa kitei ki kompani ba kin ai ïa ki kyrteng jong ki samla kiba trei ha kitei ki kompani.
Shuh-shuh, ka seng ka la buh ïa ka jingkyntu ruh ba lada don kino-kino ki khun samla jong ka Elaka Narpuh kiba don ïa ka kyrdan jingpule kaba biang, kitei ki karkhana ki dei ban pdiang bad pynrung kam ïa ki hapoh ki karkhana.
Ka seng ka la ong ba la sakhi ruh ba ki bar jylla haba ki wan trei bylla sha kane ka jylla, ki ju wan bad leh katba mon khlem da pyntip sha ki shnong-ki thaw katba ki paradoh-parasnam pat kiba don ïa ka kyrdan jingpule, ki hap ban da pan jingpynbit shwa na ki nongïalam shnong ne na ki nongmihkhmat bad ong ba kane ka pyni ïa ka jingshah leh shiliang khmat.
