Shillong, Jymmang 12
Ka National Testing Agency (NTA) ka la ïaid lait ïa ka Sorkar Jylla da kaba ka khlem ïasyllok ne pyntip eiei, pynban ka la rai hi ïa ki jaka thoh eksam (examination centres) na ka bynta khynnah kiba ïakhun ïa ka Central University Entrance Test (CUET), ka ban sdang naduh mynta ka 13 tarik Jymmang.
Kane ka jingbym kheiñ snep jong ka NTA ïa ka Sorkar Jylla ka la paw hadien ba kiba bun na ki khynnah pule ki la ud ïa ka jingshah pynngat thoh eksam CUET shabar ka Jylla, kynthup shaduh dewlynnong Andaman & Nicobar.
U Myntri ba khmih ïa ka tnat Pule-Puthi ka Jylla, Rakkam A Sangma haba kren ha ka Lah Sngi U Blei u la ong ba u Myntri Rangbah ka Jylla, Conrad K Sangma u la ïakren bad u Myntri ka tnat Pule-Puthi ka Sorkar Pdeng, Dharmendra Pradhan halor kane ka jingeh ki samla ba ïakhun ïa ka CUET.
“Kane ka jingïakren ka la kham slem khyndiat namar ka eksam kan sdang lashai ka sngi, ka jingeh ka dei namar ba ka NTA ka khlem ïasyllok ïa ka Sorkar Jylla, ha ka jaka ba kan ïasyllok shisngi arsngi shwa ban pynlong ïa ka eksam,” la ong u Rakkam.
U la ong ba ka Sorkar kam lah ban leh eiei shuh ïa kane ka kam namar don ki khynnah kiba la mih na ka Jylla ban leit sha ki jaka ba hap ban thoh ïa ka eksam.
“Wat la katta, hadien ka jingïakren u Myntri Rangbah ha Delhi, ka NTA ka la ïakren bad ka Sorkar Jylla na ka bynta ban pynbeit thymmai ïa ki jaka pynlong eksam, bad lashai ka sngi kin wan ban jurip ïa ki jaka, bad ban pynkynriah noh ïa ki jaka leh eksam jong kito ki khynnah ki bym pat dei ban thoh lashai ne lashisngi,” u la ong.
Haba kylli, u Rakkam u la ban biang ba ka jingeh ka dei namar ba ka NTA ka khlem ïasyllok ne pyntip ïa ka Sorkar Jylla, hynrei ka la shu pyntip beit tang sha ki khynnah pule, na kata ka daw ka Sorkar kam tip ïa kane ka jingeh.
“Ngi la ithuh ïa ki centre ban pynlong ïa ka eksam, hynrei haba kam pat biang ki (NTA) la dei ban pyntip sha ka Sorkar ba kam pat biang, pynban ki khlem leh kumta. Nga thikna ba ki khynnah kiba dei ban ïakhun ïa ka eksam ha ka taïew ban wan kin shah pynkynriah ban ïakhun noh ha ka Jylla lajong,” la ong u Myntri.
Haba ban jur biang ba ka dei ka jingbakla jong ka NTA kaba la wanrah ïa kane ka jingeh kaba khraw, u Rakkam u la ong, “Ka NTA ka khlem ïasyllok ne pyntip ïa ka Sorkar, kane ka dei ka jingeh kaba khraw. Ka la dei ban pyntip sha ka Sorkar ha ka por kaba biang khnang ba ki khynnah jong ngi kin ym ïakynduh jingeh.”
