Shillong, Jymmang 12
Ka Meghalaya ka la khur sa kawei ka takma rnong ha ka 7th Khelo India Youth Games, hadien ba ka kynhun ïalehkai phutbol ka la mad ïa ka jingshah rem ha ka Jharkhand da 2-1 kol ha ka jingïakhun semi final kaba la long ha Begusarai, Bihar.
Wat la kane ka kynhun hapoh ka jingïalam u Bah Jeffrey Warlarpih (football coach) ka la khur ïa ka takma ksiar mynshem snem, hynrei mynta ka kynti kam shym la lah ban ïoh ïa ka jingjop ha kane ka jingïakhun.
Kumba ka paw kane ka kynhun ïalehkai ka Jylla ka la khur ar sien ïa ka takma rnong bad kaba nyngkong ka dei ha u snem 2023.
Lah ban kdew ka Meghalaya ha kane ka kynti kaba mynta ka la khur ar tylli ki takma rnong bad kaba nyngkong ka la wan lyngba ka jingïalehkai siatkhnam na u Devraj Mohapatra ha ka Recurve hadien ba u la jop ïa u Vishu na Uttar Pradesh mynshem taïew.
Napdeng shiphew tylli ki jait jingïalehkai kiba ka Meghalaya ka la phah, tang ka football bad archery ka la ïoh takma, katba kiwei pat kum ka Athletics, Badminton, Boxing, Cycling, Gymnastics, Judo, Shooting bad ka Swimming kim shym la lah ban pynurlong na ka bynta ka Jylla.
