Shillong, Jymmang 12
Ka jingshah pynngop bad shah thok pisa ha ki briew lyngba ki kam ba la tyrwa ‘online’ ka dang bteng bad ïai jia haduh mynta, ha kaba ki la don ki briew kiba dang shah thok pisa da ki phew lak tyngka.
Katkum ka khubor kaba la ïoh na ki pulit la ong ba uwei u nongshong shnong jong kawei na ki dong ha nongbah Shillong, u la ai ka jingujor ba ha ka 7 tarik jong u Ïaïong mynta u snem, u la ïoh pdiang ïa kawei ka phone call bym ithuh, ha kaba u nong phone u la tyrwa ïa ka kam ‘online’ kaba ïadei bad ka Google Map ratings.
Shuh shuh la ong ba nalor kane, la pynïakynduh ruh ïa u bad ka kynhun jong ki briew lyngba ka rynsan social media ka ‘Telegram’, ha kaba u la lah ban pynngop ne pynkohnguh ïa u ban thep pisa kaba kot haduh T.21,20,954/-.
La ong ba kham hadien ynda na ka liang jong utei u nongujor um shym la lah ban sei noh ïa ka pisa kaba u la kamai, u la sngewthuh shai ba u la dep ban shah thok.
Ha kawei pat ka khubor, uwei u briew na kawei ka dong ha nongbah Shillong, u la ai ka jingujor sha ki pulit ba ha ka 7 bad 8 tarik mynta u bnai, uwei u briew bym lah ban ithuh, lyngba ka ‘Telegram’ u la lah ban pynkohnguh ïa u ban pynthep pisa kaba kot haduh T.1.94 lak ha kawei ka skhim thok ha ka kyrteng jong uwei u Dhanush.
