Moscow, Jymmang:
U President jong ka Russia, Vladimir Putin, ha ka Sngi U Blei u la tyrwa ban iakren iasuk markhmat bad ka Ukraine, kaba thmu ban pynkut noh ia ka thma. Kane ka jingthmu, kaba la pdiang sngewbha da u President ka Ukraine, Volodymyr Zelenskiy, uba la ong ba ka Kyiv, ka kloi ban iakren hynrei ka Russia, ka dei ban mynjur ia ka jingsangeh iasiat.
U Putin u la phah da ki hajar ngut ki shipai sha Ukraine ha u bnai Rymphang jong u snem 2022, kaba la pynmih ïa ka thma kaba la shim ia ka jingim jong spah hajar ngut ki shipai bad kaba la wanrah ia ka jingiakynad kaba jur tam hapdeng ka Russia bad katei ka ri Sepngi naduh ka por ki ‘namding jong ka Cuba ha u snem 1962.
Ha ka jingïaid lynti jong ki shipai Russia, u heh jong ka Kremlin u la tyrwa tang khyndiat, lada don, ki jingailad haduh mynta hynrei u la tyrwa ïa ka jingïakren bad ka Ukraine ha ka nongbah Istanbul jong ka Turkey kaba u la ong ba yn pynlong khlem ki jingpynbeit lypa bad kaba thmu ban wanrah ïa ka jingsuk ba shyrta bad ka jingiasngeh thma shi syndon.
U Putin ha katei ka jingai jingkren paidbah jong u, u la ong ba ka Russia ka wanrah ha kane ka sien ia ka jingtyrwa ia ka Ukraine ba kan sdang biang ïa ka jingïakren ba markhmat khlem kano-kano ka jingpynbeit lypa bad u la pynpaw ba ka Russia ka tyrwa bad khot ia ka Ukraine sha ka miej jingiakren ha kane ka Sngi Palei.
U Zelenskiy u la ong ha ka jingpynbna ha ka rynsan Social Media ‘X’ ba kane ka long ka dak kaba bha ba ki nong
Russia khatduh- khatwai ki la sngewthuh ia ka jingbha bad ki la rai ruh ban pynkut noh ïa kane thma kaba la neh la 3 snem mynta.
Utei u nongialam ka Ukraine u la ong, ba ka Ukraine ka mkhih lynti ba ka Russia ha kane ka sien kan pyntikna ïa ka jingsangeh thma kaba pura, kaba neh, bad kaba lah ban shaniah.
Kumjuh ruh u President jong ka U.S., U Donald Trump, u la ong ba u kwah ban shah kynmaw kum u nongpyniasuk bad uba la kular bunsien ban pynkut noh ia ka thma, u la ong ba kane ka long ka rai kaba jong ka Russia bad ka Ukraine lada kine ki arliang ri ki lah shisha ban pynkut noh shi syndon ia ka jingiakynad ba dka jing iapyniap kaba la i-shyrkhei bad kaba la neh slem bha.
Ka jingtyrwa jong u Putin ban ïakren beit bad ka Ukraine, ka la wan hadien katto katne kynta, hadien ba ki ri kiba khraw bor jong ka Europe, ki la dawa ha ka Sngi Saitjaiñ ha Kyiv, ba u Putin, un mynjur ïa ka jingsangeh thma kaba 30 sngi khlem jingteh lane ban mad ïa ki jingpynshitom thymmai.
U Putin u la kyntait ia kaei kaba u la ong ba ka dei ka jingpyrshang jong ki katto katne ki ri Europe ban wanrah ia ka jingiasuk hapdeng ka Russia bad Ukraine.
