Shillong, Jymmang 13
Ka Meghalaya kan ïakhun ban ïaknieh ïa ka trophy ha ka lympung ïalehkai 3rd NECDC Senior Men’s Interstate Friendship Tournament 2025, hadien ba ka la ïoh jingjop ha ka semi-final pyrshah ïa ka Arunachal Pradesh da 7 wiket ha ka Sngi Ba-ar ha madan kriket Sovima kaba ha Nagaland.
Hadien ba ka la jop ïa ka jingkynting pisa bad pynlong ïa ka Arunachal ban tied nyngkong, ka Megha-laya ka la lah ban pyn-khyllem ïa baroh ki nong-tied ka liang pyrshah na ka bynta ban tied tang 101 run ha ki 33.1 over ha shwa ba kan beh ban kynjoh sha ka thong ha ki 19.3 over.
Ïa kane ka lympung la pynlong da ka Nagaland Cricket Association hapoh ka jingpeit jong ka North East Cricket Development Council. Ka jingthmu jong kane ka lympung ka long ban ïarap ha ka ban pynkhreh ïa ki jylla na ka bynta ka samoi ïalehkai 2025-26 jong ka BCCI ki ban sa long shen.
Kane ka dei lypa ka jingïalehkai kaba bha tam na ka bynta ka Meghalaya namar ha ki ar tylli ki jingïalehkai ba la dep la ïohi ba kim shym la lah ban rung sha ka phainal wat hapdeng ka jinglong jingman ka suiñbneng ka long kaba sniew.
Mynta ka sngi, ki lai ngut ki nongkawang bol kiba kynthup ïa u Manish Sharma, u Ram Gurung bad u Aryan Borah ki la pynshong nongrim ïa ka jingjop na ka bynta ka Meghalaya. U Manish u la shim 4 wiket ha ki 5.1 over, kumjuh u Ram uba la shim lang 3 wiket ha ki 7 over bad u Aryan pat 3 wiket ha ki 10 over. Napdeng ki nongtied ka Arunachal kiba la lah ban tied bun ki long u kapten u Neelam Obi uba la ïoh 28 run. Wat la ka Aruna-chal ka la lah ban tied haduh 50 run ha kaba sdang bad shah pynhap tang shi wiket, hynrei ka jinghap wiket iwei hadien iwei ka la pynlong ïa katei ka kynhun ban duh haduh 6 wiket.
U Arpit Bhatewara u la lamkhmat ha ka jingbeh, da kaba u la tied 49 run na ka 39 bol na ka bynta ka Meghalaya ha kaba la kynthup lang ïa 10 tylli ki ‘four’. Ma u bad u Arien Bonchang Sangma (22 run na ka 30 bol lem bad 1×4, 2×6) ki la lah ban ïatied lang ban kynjoh sha ki 56 run, katba u Nishanta Chakraborty (16 not out) bad u Lerry G Sangma (1 not out) ki la lah ban pynurlongïa ka Meghalaya ban kynhjoh sha ka thong lem bad u Kishan Lyngdoh (13 run na ka 21 bol).
Lyngba kane ka nam jop, ka Meghalaya kan pynkhreh ban ïakhun pyrshah ïa ka Nagaland ha ka jingïakhun phainal ka ban long ha ka Sngi Palei. Ka Nagaland ka la pynliem ïa ka Manipur da 4 wiket ha ka jingïalehkai semi-final kaba ar hynne ka sngi.
Ha ki jingïalehkai ha ka Group-B, ka Meghalaya ka la pynliem nyngkong eh ïa ka Nagaland da 14 run hadien ka jingshah pynthut ha u slap. Nangta ka la pynliem sa ïa ka Sikkim da 9 wiket na ka bynta ban wan ha ka kyrdan ba hakhlieh bad ban rung sha ka semi final.
Ha katei ka jingïakhun pyrshah ïa ka Nagaland, u Jaskirat Singh Sachdeva u la tied 67 ron bad u Arpit u la ïoh 57 ron, katba ki nongpynhap wiket pat ki kynthup ïa u Akash K Choudhary, u Abhishek Kumar, u Ram bad u Aryan. U Ram u la shim 3 wiket ha ka jingïakhun pyrshah ïa ka Sikkim, katba u Akash u la shim 3 wiket bad u Abhishek 2 wiket. U Arpit (not out) u la tied 55 run, kaba dei ka shiteng spah ka jong u, katba u Akash pat u khlem shah pynkhyllem na ka bynta ban ïoh 53 ron.
