Shillong, Jymmang 13
Ka Sorkar Jylla lyngba ka tnat District Council Affairs (DCA) shen kan sa ai jingmynjur noh ïa u MDC shu sieh ba la tyrwa da ka executive committee jong ka Voice of the People Party (VPP) ha Khasi Hills Autonomous District Council (KHADC).
Ki MDC ka VPP hapoh ka jingïalam u Chief Executive Member (CEM) ka KHADC, Bah Shemborlang Rynjah ha ka Sngi Ba-ar ki la ïakren ïa kane ka kam MDC shu sieh bad u Symbud Myntri Rangbah ba khmih ïa ka tnat District Council Affairs (DCA), Bah Prestone Tynsong.
Haba kren bad ki lad pathai khubor, u executive member ka KHADC, Bah Powell Sohkhlet u la ong ba ka seng ka la ïakren bad u Myntri ba dei khmih ban pynmih noh ka byrta ba la mynjur ïa u Bah Mathew Makdoh kum u MDC shu sieh.
“Na ka liang jong ka Sorkar ka la pdiang ïa kane bad shen kin sa pynmih noh ïa ka byrta. Te, na ka liang jong ngi kum ka seng ngi pynpaw jingsngewnguh ïa ka Sorkar. Lehse ym ju kham don ba ka Sorkar Jylla kaba synshar da kawei ka seng bad kaba synshar ha district council da kawei ka seng ban pdiang ïa kane ka jingtyrwa,” u la ong.
Haba kylli halor ka jingkynthoh u Nongïalam ka Liang Pyrshah ha KHADC, Bah Titosstarwell Chyne uba la ong ba kane ka jingkwah MDC shu sieh ka VPP ka dei tang ka jingpynsyrwa kai ïa ka pisa, u Bah Powell u la ong ba ka jingkynthoh kam don nongrim satia, namar ka jingtyrwa ban don u MDC shu sieh ka dei katkum ka bor ba la ai da ka Riti Synshar hapoh ka Khyrnit ba Hynriew.
“Nga tharai lada long kumta ka mut ngi hap ban buh jingkylli ïa ka Riti Synshar. Ka Riti Synshar ka Ri India lyngba ka Khyrnit ba Hynriew ka ong ba dei ban don u dkhot ba shu sieh, lada ngi thung ïa uta ba dei katkum ka aiñ kan pynsyrwa kai ïa kaei. Ngam tip kata ka jingong u Nongïalam ka Liang Pyrshah kan pynsyrwa ha kano ka rukom,” la ong u MDC ka VPP.
