Nongpoh, Jymmang 13
Ha kawei ka jingjia kylla kali ha ka janmiet jong ka sngi Ba-ar ha ka por kumba 8:40 baje eiei, kawei ka kali kamai kaba don ïa u registration number ML04-D-0396 ka la kylla khongpong bad julor na ki bynta ba shakhmat hadien ba ka la leit ban tynrah ïa ka jingker nar jong ka surok bah National Highway 6 ha Mawdiangum, Ri Bhoi District.
Katkum ka tyllong khubor ba la ïoh lum, la ïathuh ba ïa katei ka kali la ñiah da uwei u rangbah bad la shong lang da ka lok ka jong u. La ïathuh ba ka la don ka jingïania bad ïadom hapdeng kine ar ngut shi tnga kat haduh ba ka lok da ka jingbitar, ka la pynphai kynsan ïa u steering jong ka kali.
La ïathuh ruh ba hadien jong katei ka jingjia, na ka liang ki paidbah kiba sakhi ïa katei ka jingjia, ki la wan ban ïarap sei ïa kitei ar ngut shi kurim kiba la mynsaw malu- mala bad sahkut hapoh katei ka kali. La ïathuh ruh ba tang mar ïa dep sei napoh katei ka kali, kitei ar ngut shi kurim ki la phet noh bak na katei ka jaka.
Na ka liang jong ki bor pulit ka thanat Nongpoh ynda ki la wan poi ha katei ka jaka ba jia ka jingkylla kali, ki dang pynlong ïa ka jingtohkit ban lap ïa ki jingshisha halor kane ka jingjia.
