Shillong, Jymmang 13
Kan long ka sien kaba nyngkong eh ba ka Eastern Ri Bhoi kan ïoh ïa ka madan ïalehkai phutbol ka ban sa siang da u phlang plastik ha ka shnong Nongsder bad kane kan long ruh ka jingmyntoi kaba khraw na ka bynta ki khynnah ïalehkai kiba don ïa ki sap ba kyrpang.
Kane ka la wan urlong hadien ba u Myntri ka tnat ïalehkai, Bah Shakliar Warjri, u la buh ïa u maw nongrim na ka bynta ban tei ïa ka madan phlang plastik (artificial turf) hapoh katei ka shnong ha ka Sngi Ba-ar. Ha kane ka sngi la ïadon lang u MLA ka 12-Umroi Bah Damanbait Lamare kum u symbud kongsan, nangta u Chief Secretary ka Jylla Bah D.P. Wahlang (IAS), u Director ka tnat ïalehkai u D.D. Shira (MCS), u Rangbah Shnong ka Nongsder lem bad ki nongshong shnong, ki nonghikai bad ki khynnah skul.
Ïa kane ka projek la thmu ban tei ha ka jinglut kaba T. 10 klur ha kaba yn pynbiang ruh ïa ki jaka khreh jong ki nongïalehkai bad kiwei kiwei ki jingdonkam. Kat kum ka thong ba la buh ban pyndep ka long haduh khyndai bnai.
Haba ai jingkren ha kane ka sngi, u Bah Shakliar u la kdew ba hapoh ar snem, kane ka dei ka madan phlang plastik kaba ar ba la tei ha Ri Bhoi District. U la pynpaw ka jingïaroh halor ka jingkiew ki khynnah ïalehkai phutbol napoh kane ka district. Kum u Myntri ba dei khmih ïa ka tnat ïalehkai, u la pynskhem ïa ka jingangnud jong ka sorkar ban nang ïai kyntiew ïa kane ka jingïalehkai ha ka jylla.
U la ong ba kane ka dei ka jingjop jong ka Sorkar Jylla, kynthup naduh ka jingdon ïa ki jaka ïalehkai, ka jinglah ban pynlong lai sien lynter ïa ka Meghalaya Games bad ka jingpynkhreh ïa ka 39th National Games ka ban long ha u snem 2027.
Ha kane ka sngi, u Bah Warjri u la pynkup burom ruh ïa u Jeffery Kharmawlong na Nongsder, uba la khur ar tylli ki takma rnong na ka bynta ka ri India ha ka XXIII Asian Arm Wrestling Championship, XXII Asian Para Arm Wrestling Championship 2025 kaba la long ha ka nongbah Delhi naduh 3 haduh 11 tarik mynta u bnai.
