Jowai, Jymmang 13
Ka Phramer CC ka la duh noh ïa ka lad ban jam sha ka semi final ha ka District Cricket League 2025 ba la pynïaid da ka West Jaiñtia Hills District Cricket Association, hadien ba ka la mad ïa ka jingshah rem ha ka Young Lad’s CC da 7 wiket ha ka jingïalehkai ba khatduh kaba la long ha ka Sngi Ba-ar.
Ïa ka jingkynting pisa la jop da ka Phramer ha kaba ka la kam trai ban tied nyngkong na ka bynta ban ïoh 101 run bad shah pynhap 10 wiket ha ki 19.4 over. U Wanteimi Ymbon u la tied 18 run na ki 18 bol ryngkat kawei ka ‘six’ bad kawei ka ‘four’, kumjuh u Melan Suchiang pat u la ïoh 17 run na ki 11 bol ryngkat kawei ka ‘six’ bad kawei ka ‘four’. U Namewanki Pakynteiñ, nongkawang bol jong ka Young Lad’s CC u la shim 3 wiket ha ki 4 over.
Haba wan shimti ïa ka pali kaba ar, ka Young Lad’s ka la lah ban kynjoh sha ka thong da kaba tied 105 run ha ki 14.5 over bad shah pynhap 3 wiket. U Mewada Shylla (not out) u la long u nongtied uba paw ha kaba u la ïoh 57 run na ki 41 bol ryngkat 2 tylli ki ‘six’ bad 6 tylli ki ‘four’ bad ban ïohpdiang ruh ïa ka nam Man of the Match.
Te kumta na ka Pool-A ki kynhun kiba la rung sha ka semi final ki long ka West Jaiñtia Police CC kaba la wan ba nyngkong bad ba-ar ka Mupliang SC, katba na ka Pool-B ki long ka Ummulong CC kaba la wan ba nyngkong bad ka Mowkaiaw CYC kaba la wan ba-ar.
