Shillong, Jymmang 13
Ki nongdie jaiñ thynrim (second hand) kiba don ha Khasi Market bad kiba la shah ban pynkynriah jaka shipor sha Garikhana kaba don ha Stand Bhoi ha ka mala ba hajrong, ha ka 13 tarik Jymmang 2025, ki la pynpaw ïa ki jingeh bad ka jingshem jynjar hadien ba na ka liang ka Shillong Municipal Board (SMB) ka la buh por tang 10 bnai ban pynkynriah ïa ki na Motphran napoh ka khrum jong ka Stand Jaïaw hynrei mynta sa tang katto-katne bnai eiei, ka la jan dap 2 snem ba ki la shah pynkynriah shong na katei ka jaka.
Haba ïoh ban ïakren bad kitei ki nongdie jaiñ, ki la pynpaw ïa ka jingsngewjynjar ban shong ha katei ka mala ha Stand Bhoi namar naduh ba ki la sdang ban shong die ïa ki jaiñ, ka ïew-ka hat ka la hiar shaba palat bad ki la shu pynlut por tang ha ka ban shu shongkai namarba ki paidbah ki la thait ban wan sha katei ka jaka die jaiñ na ka jingpajih eh katei ka jaka na ka ïew.
“Ngi shem jingeh ha ka ïew-ka hat hangne namarba kam dei ka jaka kaba ïajan bad ka ïew bad ki nongleit-nongwan ruh ki ju ong ba ki thait ban wan shane namar ka jingjngai shaduh shane. Ka die-ka thied ruh ka duna bha bad kam long kum shatei. Ka jingshit hangne ruh, ka shit bha bad kiba bun ki briew ki ju ud ba ka shit bha bad ki phet noh”, ong kitei ki nongshong die jaiñ.
Shuh-shuh, ki la ong ruh ba mynta ka la jan dap 2 snem ba ki la shu shong satar ha katei ka jaka namarba ka Municipal ka la ai ïa ka jingkular ban wanrah biang ïa kitei ki nongdie jaiñ sha Motphran kaba dei ha kajuh ka jaka kaba dang tei mynta.
“Ka Municipal ka la ong ba kan pyndep noh hapoh ka 10 bnai bad ba yn sa pynkynriah biang ïa ngi sha kajuh ka jaka hynrei mynta ha u bnai Nailar ngin dap 2 snem ba ngi la shong hangne. Haba mynta ruh ki dang pynïeng tang ki nar lehse, ka dang slem ka kam ban shna ïa kita ki mala kiba bun bad ban pynkynriah ïa ngi ruh ka dang slem”, ong kitei ki nongshong die jaiñ.
Ki la ïathuh ruh ba ka jinghiar ka ïew-ka hat bad ka kamai-kajih jong ki, ka dei naduh ba la pynkynriah ïa ki sha katei ka jaka bad ong ba wat ki jaiñ barim bun ruh, ki dang bun kiba sah kumjuh bad lada ki don kiba thied ruh tang kawei ka jaiñ lane ar tylli ha ka shisngi.
Ki la ong ruh ba kiba shong die jaiñ thynrim ha Khasi Market ki don haduh 85 tylli bad kham bun ki dei ki longkmie bad ki don pat katto-katne ngut kiba dei ki shynrang.
Kumta, kitei ki nongshong die jaiñ ki la kyrpad ïa ka Municipal bad Sorkar ba ki dei ban leh kham kloi ha ka ban tei ïa katei ka jaka ha Motphran khnang ba kin lah ban leit phai biang sha kajuh ka jaka ban biang ka ïew-ka hat bad ba ki paidbah nongthied ruh kin suk ban wan.
