Shillong, Jymmang 13
Hadien ka jingud jingnam jong ki samla pule kiba hap ban ïakhun ïa ka eksamin Central University Entrance Test (CUET), wat la ka la dei ha ka khyllipmat ba khatduh, hynrei ka Sorkar Jylla ka la shim khia ban tuklar mardor bad ka tnat Pule-Puthi ka Sorkar Pdeng, kaba la pynbor pat ïa ka National Testing Agency ban pynbeit biang ïa ki jaka pynlong eksam ha ka Jylla.
U Commissioner & Secretary ka tnat Pule-Puthi ka Jylla, Vijay Kumar Mantri ha ka Sngi Ba-ar u la pyntip ba ka National Testing Agency (NTA) ryngkat ka jingïatreilang bad ka Sorkar Jylla ka la ithuh shuh-shuh ïa ki jaka thoh eksam ha Jylla, bad baroh ki samla kiba shah pynngat thoh eksam shabar ka Jylla kin sa ïoh ban thoh noh ha ki centre kiba don hapoh ka Jylla.
Haba pynpaw ba ka Sorkar Jylla kam don bynta eiei ruh em ha ka jingbuh ïa ki jaka thoh eksamin, une u ophisar u la ong ba ka long kaba kongsan ban tip ba ka jingpynngat ïa ki centre thoh eksam ka dei kaba la leh beit tang da ka NTA da kaba pyndonkam ïa ka Automated Software System.
Kat kum kane ka Automated Software System, la pynngat centre kat kum ka jingjied hi jong ki samla ba ïakhun ïa ka eksam.
Ki samla ki hap ban jied saw tylli ki jaka thoh eksam bad kane ka system ka jied pat ïa ki centre napdeng kine saw tylli ba la jied hi da ki samla. Kumta, lada ki samla ki hap thoh shabar ka Jylla Meghalaya, ka dei hi namar ba ki la jied ïa ka jaka kum kawei na ki jaka ba ki kwah. Kane ka kynthup ïa kaba u samla pule u la jied ban thoh ïa ka eksam shaduh Port Blair,” u la ong.
Katkum ka jingpyntip na u Commissioner & Secretary, haduh 12,685 ngut ki samla pule na Meghalaya ki la pynrung kyrteng ban ïakhun ïa ka eksam CUET (UG), 2025. Napdeng kine, 7742 ngut ki samla ki la shah pynngat ha ki centre kiba don ha Meghalaya namar ka jingduna ki centre. Haduh 4943 ngut ki la shah pynngat ha ki centre kiba don shabar ka Jylla bad na kine, 4654 ngut ki la ngat ha ki centre kiba don ha Assam, bad tang 289 ngut ki la ngat ha ki centre ba shabar ka Meghalaya bad Assam.
U Mantri u la pyntip ruh ba tang 93 ngut ki samla ki la shah pynngat ha ki centre kiba don shabar jong ka thaiñ Shatei Lam Mihngi bad uwei u samla pule u la ngat sha Port Blair bad kane ka dei namar ka jingjied hi jong u ïa ka jaka kaba ar.
U Mantri u la pyntip ruh ba ki don tang 2 tylli ki sor ban jied ha Meghalaya bad 5 tylli ki sor ban jied ha Assam, bad namar ka system ka buh ban jied beit thik tang na ki saw tylli ki jaka ba la jied hi da ki samla pule, ki samla pule ki la dei ban jied beit thik tang kawei napdeng kine 5 tylli ki jaka sor ban lait na ka jingleit shabar ka thaiñ.
Halor ka jingslem ban pyntip ïa ka jingduna ki centre, une u heh ophisar u la ong ba ka NTA kam shym la phah ktien ne pyntip lypa sha ka Sorkar Jylla halor ka jingduna ki centre thoh eksam hapoh ka Jylla. Kane ka kam ka la mih ha ka khyllipmat ba khatduh haba ki samla pule ki la shah pynngat leit thoh eksam shabar ka Jylla Meghalaya.
U la pyntip ba ka Sorkar Jylla hadien ba ka la ïoh jingtip ïa kane, mar-mar ka la buh haduh 800 tylli ki kor computer ha kylleng ki jaka pule bad ïa ka thup jong kine ki jaka pule ban pynlong kum ki centre thoh eksam la ai jingtip ruh sha ka NTA.
Ka NTA ka la thung ïa ka Tata Consultancy Services (TCS) kum ka agency ka ban khmih bad pynshisha ïa ki centre ki ban pyndonkam da ki kor computer.
“Kane ka dei ka kam kaba hap leh bad ka ban shimpor katto-katne sngi bad ka jingjurip ïa kine ki centre ka la ïaid shakhmat,” u la ong.
Ha kajuh ka por Mantri u la pynpaw ka jingsngewnguh ïa ki skul bad ki kolej ha kylleng ka Jylla Meghalaya kiba la mih shakhmat ban tyrwa ïa ki computer lab, na ka bynta ban pynlong ïa ka eksam CUET ha ka Jylla.
Ka NTA ka la pyntip ba baroh kito ki samla pule kiba dei ïakhun ïa ka eksam hadien ka 16 tarik Jymmang 2025, kiba la jied ban thoh ïa ka eksam ha Meghalaya, hynrei ki la shah pynngat shabar ka Jylla kin sa ïoh noh ïa ki centre hapoh ka Jylla Meghalaya, bad na ka liang ka tnat kan sa pynthikna ïa kane lashai ne ha ka sngi ba bud.
