Adampur, Jymmang 13 (UNI)
Kum shi bynta ban pynpaw ïa ka jingkam lamler jong ka Pakistan ba ka la pynpra ïa ka ktem liengsuiñ jong ka Adampur, u Myntri Rangbahduh ka ri, u Narendra Modi, ha ka Sngi Ba-ar, u la leit ban jngoh ïa kane ka jaka shipai kaba kongsan bad maham biang sa shisien ïa ka Pakistan pyrshah ïa kino-kino ki jingleh bymman hadien-habud, kynthup ïa ka jingthombor da ki lehnoh.
“Ka nongrim jong ka India pyrshah ïa ki kam lehnoh mynta ka la shai bad kano-kano ka jingshah thombor kan mad kylla da ka jingjubab kaba kloi bad kaba tyngeh,” u la ong katba u dang ïakren bad ki ophisar lem bad ki shipai da kaba ai jingïaroh ïa ka jingshlur jong ki.
Haba pynkynmaw biang ïa ki 3 tylli ki jingkdew ba kongsan ha ka jingkren jong u ha ka miet ba la dep, u Myntri Rangbahduh u la ong, “Nyngkong eh, lada don ka jingshah thombor ha ri India, ngin jubab ha la ka jong ka rukom, ha la ka jong ka jingbuh kyndon bad ha la ka jong ka por, kaba ar, ka India kan ym pdiang satia ïa kano-kano ka ‘Nuclear Blackmail’ bad kaba lai, ngin ym peit ïa ka Sorkar kaba kyrshan ïa ki lehnoh bad ki kynrad jong ki kam lehnoh kum kiba treikam la ka jong”.
“Ka ‘Laxman Rekha’ jong ka India pyrshah ïa ki kam lehnoh mynta ka la paw shai. Lada don kano-kano ka jingshah thombor, ka India kan ai ïa ka jubab kaba tyngeh,” u la ong.
U la ong ba kane ka la paw shynna ha ka por jong ka ‘Surgical Strike’, ka jinghiar thma na suiñ bad mynta, ka “‘Operation Sindoor’ ka dei ka jinglong-jingman (kumba ju long) bathymmai jong ka India.”
U la bynrap shuh-shuh ba ka “pyrthei ruh ka nang ïaid shakhmat da kaba sngewthuh ïa kane ka dur thymmai jong ka India bad ïa kane ka rukom treikam bathymmai”.
Haba ai jingïaroh ïa ki shipai, u Modi u la ong, “Man la ka khyllipmat jong ka ‘Operation Sindoor’ ka long ka sakhi ïa ka jingkhlaiñ jong ki shipai India. Ka jingïatreilang jong ki shipai jong ngi ka la long shisha kaba khraw, la ka long ka Army, Navy ne Air Force”.
Haba ai khublei ïa ka IAF na bynta ka jinghiar thma kaba thik-pa-thik ïa ki ktem lehnoh, u Modi u la ong, “Ka kynhun shipai suiñ jong ngi, tang hapoh 20-25 minit ka la buh sohpdung ïa ki ktem lehnoh kiba don shapoh ka Pakistan bad ban siat beit thik ïa ki ktem kiba la buh thong – la lah ban leh tang da ka kynhun shipai kaba tbit bad kaba bit ba biang ha ka liang ki kor ka juk stad teknoliji ba mynta”.
“Ka jingsted bad ka jinglong tikna jong phi ka long kaba haduh katta-katta ha kaba u nongshun u khlem lait kren. U tip tang ha kano ka por ba u dei ban mareh. Ka jingthmu jong ngi ka long ban siat ïa ka ktem treikam jong ki lehnoh hapoh Pakistan, ban pynïap ïa ki lehnoh, hynrei nga lah ban mutdur tang ïa ka jingïasylla ba ka Pakistan ka lah ban pynmih da kaba pyndon bynta lang ïa ki liengsuiñ kit briew jong ka. Nga sngew sarong ba phi la leh da kaba phikir ïa kane ka kam kaba phylla khlem da pynjulor ïa ki liengsuiñ paidbah bad ruh ban ai ka jingjubab kaba tyngeh ïa ka,” ong u Modi.
U Myntri Rangbahduh u la ong ruh ba hadien ka jingkyrpad na ka Pakistan, ka India ka la shu pynsangeh noh tang ïa ka kam ba ïadei bad ki shipai jong ka bad maham ba “lada ka Pakistan ka pyni biang ïa ki kam lehnoh ne ka jingbyrngem ïa ki shipai, ngin ai ïa ka jubab kaba biang tam”.
“Ngin sa ai ïa kine ki jubab ha la ka jong ka rukom, ha la ki jong ki kyndon, bad ka jingkyrmen skhem kaba la buhrieh ha lyndet jong kane ka rai ka dei ka jingkhlaiñ, ka jingshlur, ka mynsiem ba shynrang bad ka jinglong husiar jong phi,” u la bynrap.
