Shillong, Jymmang 13
Ki MDC ka Voice of the People Party (VPP) ba kynthup na Khasi Hills Autonomous District Council (KHADC) bad Jaiñtia Hills Autonomous District Council (JHADC), ha ka Sngi Ba-ar ki la leit ud hakhmat u Symbud Myntri Rangbah ba khmih ïa ka tnat District Council Affairs (DCA), Bah Prestone Tynsong namar ka jingbym ïoh skhim ki MDC ha ki konstitwensi ba don ha sor lyngba ka 15th Finance Commission.
Ha kane ka jingleit sha ka Sorkar ban ïarap pynïoh ïa ki skhim, na ka liang ka KHADC la leit hi da ka executive committee hapoh ka jingïalam u Chief Executive Member (CEM), Bah Shemborlang Rynjah, katba na JHADC la wan mihkhmat da u Nongïalam Liang Pyrshah, Bah Andrew Shullai uba dei u MDC na Jowai North.
Haba kren hadien ka jingïakynduh bad u Symbud Myntri Rangbah, u executive member ka KHADC ba peit ïa ka tnat Kam Pynroi, Bah Powell Sohkhlet u la ïathuh ba ki don ki shnong kiba hap ha ki jaka Municipal jong ki konstitwensi ba don ha sor Shillong bad Jowai, bad kine kim ïoh ïa ka skhim na ka 15th Finance Commission lyngba ka Ministry of Panchayati Raj kaba tip da ka Rural Local Bodies.
“Ki don ki konstitwensi ha Shillong bad Jowai kiba hap hapoh ki jaka Municipal kim ïoh satia ïa kane ka skhim namar ka dei ka skhim ïa ki nongkyndong. Ngi la ïoh ïa ka pisa na ka 15th Finance Commission bad ngi la sam sha ki MDC, kine ki MDC sor pat ki ong kumno ïoh skhim tang ki MDC ba dei na sha nongkyndong,” u la ong.
U EM u la pyntip ba na ka liang u Bah Prestone u la shim khia bad kular ban khot ïa ka jingïalang bad ka tnat Pynroi Sor ka Jylla, ka C&RD ban loit ban law ïa kane ka jingeh.
U la ong ba ki MDC ba mynshwa ki ïoh ïa kane ka skhim namar ba kim donkam ban leh da ki kor internet lane ban phah sha ki portal sha ka Ministry.
Haba kylli, u Bah Powell u la ong ba ha kaba sdang kam donkam ban leh lyngba ka portal ki MDC sor ruh ki ïoh, hynrei naduh ba ka ïaid ‘online’ ka portal ka la kyntait hi hangto.
