Jowai, Jymmang 13
Ka Jaiñtia Student’s Union (JSU) kala dawa ba lada jia ba ka Tura ka long ka ‘Winter Capital’ jong ka Jylla Meghalaya, kumta ka Jowai ruh ka dei ban ïoh ïa ka kyrdan ‘Summer Capital’.
“Ka Meghalaya ka dei ka jaka sah jong ki lai tylli ki jaidbynriew riewlum kata ki Jaiñtia, ki Khasi, bad ki Garo. Kumta dei ban leh mar katjuh ïa baroh ban pynneh ïa ka jinglong hok bad jingïatylli ha ka jylla,” la ong ka JSU ha ka kyrwoh ha ka sngi Ba-ar mynta ka taïew.
Ka seng ka la pynpaw ïa ka jingshisha ba ka thaiñ Jaiñtia Hills ka dang sah ha ka jingduna bad ka dang ïai bteng ban ïakynduh ïa ki jingeh kiba khraw ha ka liang ki jingtei.
Ka jingai ïa ka Jowai ïa ka kyrdan kum ka ‘Summer Capital’ kan ym kyntiew tang ïa ka roi ka par hynrei kan pynthikna ruh ïa ka jingïaryngkat hapdeng ki jaidbynriew,” la ong ka JSU.
Ka JSU ka la maham ba lada ka Jaiñtia Hills kan shah kyntait, ka JSU ryngkat bad ki paidbah jong ka thaiñ, kan pynlong ka jingïakhih ban dawa ïa ka bhah kaba dei hok jong ki.
