Nongstoiñ, Jymmang 13
Ha ka 13 tarik u Jymmang, 2025 ka skul Assembly of God Secondary Schools Siejlieh ka la pynkup burom ïa ki khynnah skul jong ka, kiba la wan shakhmat ha ka eksamin SSLC mynta u snem.
Ha katei ka sngi pynkup burom, u Dr. Juristman Ïawphñiaw, MDC ka Nongstoiñ u la long kum u kongsan ha ryngkat ka Kong Ela Begum Laskar, Joint Director of School Education & Literacy kum ka symbud kongsan ha ka jingdonlang ruh u Pastor Aibor Thabah Headmaster ka Eagle’s Wings Academy Siejlieh, u Elder R Tongkhar, ki kmie ki kpa bad kiwei kiwei.
Katei ka jingpynkup burom ka long kum ka dak ka jingkmen namar baroh kiba la ïaleh ïa ka eksam SSLC ki la pass lut 100 na ka 100 kynthup ïa ki 10 ngut kiba la ïoh 1st Division, 15 ngut 2nd Division bad 5 ngut ha ka 3rd Division.
Shuh shuh ha katei ka sngi, ka skul ka la pynkup burom ruh ïa kiwei ki khynnah skul kiba la wan shakhmat ha kiwei pat ki bynta kum ka heprit Kanwanwad Thyrniang kaba la wanrah burom ïa ka skul lyngba ka Science Exhibition kumjuh ruh ïa u Babu Khampher Puweiñ uba dei uwei na ki radbah jong ka skul uba ju pynshlur ïa ki khynnah bad kyrshan ha ka sobjek Science bad kiwei kiwei.
Ïa katei ka jingïalang la pynlong ha phyllaw ka skul bad la pynïaid ïa katei ka jingïalang da u Dr. Rev MS Nongrem Headmaster ka Assembly of God Secondary Schools Siejlieh.
U MDC ka Nongstoiñ, Dr. Jurisman Iawphñiaw haba kren kum u kongsan u la kyntu ïa ki khynnah skul da kaba u la ong ba ka jingjied ïa ki paralok ka dei kawei na kiba kongsan ha ka jingim briew, dei ban tip kumno bad ïano badno ban ïalok ïano ban kiar.
