Shillong, Jymmang 13
Ka jingjur jong ki kam tuh kam thiem ka dang ïai bteng na kawei ka sngi sha kawei pat, ha kaba ki runar ki la ïoh ban prong tuh ïa ki ïing bad ban rah tuh ki tiar ki tar kiba shongdor da ki phew lak bad ruh ban tuh ïa ki arshaka.
Katkum ka khubor na ki pulit la ong ba ka Madhumita Das ka la ujor ba ha ka 9 tarik mynta u bnai, ha ka por kumba 1 baje mynsngi, ki runar bym lah ban ithuh, ki la prong tuh hapoh ka ïing jong ka, kaba don ha Motinagar, Shillong bad ban tuh ïa ka ksiar, ka rupa bad kiwei kiwei ki tiar kiba shongdor haduh kumba T.21 lak bad ruh ka pisa kaba long T.20 hajar.
Ha kawei pat ka khubor, u Narayan Rai uba na Motinagar, Shillong u la shu pyntip da ka ktien ba ha ka 10 tarik mynta u bnai, ha ka por kumba 8.40 mynmiet, ar ngut ki runar bym lah ban ithuh, kiba la kah dur ïa lade, ki la knieh jubor ïa ka mobile phone ka jong u bad ban phet noh da kawei ka arshaka.
Katba na ka liang jong u Upendra Roy u la ai ka jingujor ba hapdeng ka miet jong ka 10 bad 11 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-Q-7037 na ka phyllaw jong ka jaka sah ka jong u, kaba don ha Dongkadiang, Nongmensong, Shillong.
Kumjuh, na ka liang jong ka Kong Jelima Lytep ka la ai ka jingujor ba ha ka 11 tarik mynta u bnai, ha ka por kumba 10 baje mynmiet, ki runar bym lah ban ithuh, ki la tuh ïa uwei u masi na ka sem masi jong ka, kaba don ha ka shnong Lummuriap kaba hap hapoh ka Barato OP ha West Jaiñtia Hills.
