Shillong, Jymmang 13
U Myntri ba khmih ïa ka tnat Bording ha ka Jylla, Abu Taher Mondal u la kubur ba ka Jylla Meghalaya ka dei kawei napdeng ki Jylla kiba suki ban pyntreikam ïa ki ‘smart meter’, bad ka daw ka dei namar ba don ki kampani kiba la don dak sniew (black list) sha kiwei ki jaka kiba shim bynta ban thep ‘tender’ ha kane ka Jylla.
Katkum ka jingong u Myntri, ïa ki ‘smart meter’ yn lah ban pyntreikam pura ha ka Jylla ha u snem 2035.
“Ki ‘smart meter’ ki dei kiba hap ha ka RDSS (Revamped Distribution Sector Scheme), bad ka long kaba kongsan ïa baroh ki Jylla ban pyntreikam. Ngi la dep ai ïa ka kam bad shen ngin ai noh sa ka LOI (Letter of Intent) bad ngin pynthikna ïa ki nongpyndonkam bording ba ka jingpyntreikam ïa ki ‘smart meter’ kan long kaba ïaid beit,” la ong u Mondal haba kren bad ki lad pathai khubor ha ka Sngi Ba-ar.
Halor kane ka jingdon ki kompani ba la don dak sniew kiba thep ‘tender’, u la ïathuh ba dang shen u la rah ïa kane hakhmat u Myntri ka Ministry of Power ka Sorkar Pdeng bad pynpaw ha u ba ka tnat kam tip lada don kiba thep ‘tender’ hynrei hadien ba la pynrung kyrteng hapoh ka system la lap ba ki don ki kompani kiba la don dak sniew shawei.
“U (Union Minister) la pynthikna ba un khmih bniah ïa kane, bad kular ba nangne shakhmat ïa ki kompani kiba la don dak sniew yn pynpaw beit ha ka portal ba la buh kyrpang, khnang ba yn lah ban peit na kata ka portal,” la ïathuh u Mondal.
Haba kylli, u Mondal u la ong ba haba pyntreikam da ki kor thymmai, ka jingsngew artatien kan don beit.
“Baroh ki Jylla ki la ïaid shakhmat ban pyntreikam ïa ki smart meter. Ki don bun ki jingujor bad khatduh ïa kine ki kam la dep ban pynbeit bad la pyntreikam ïa ki smart meter. Ngi dei kawei napdeng ki Jylla kiba dang sah shadien ha ka jingpyntreikam ïa ki smart meter,” u la ong.
Ha kawei ka liang u Mondal u la ong ba ka Sorkar ka la pynkhreh ban pynkhlaiñ ïa ka jingkynshew bording, ha kaba u la pyntip ba ka tnat ka dang ïakren bad ka Ministry of Power ka Sorkar Pdeng ban pynkhreh bad pynjanai bad kham pynbha ïa ka jingpynmih bording ha u snem 2035.
U la ong ba kumba ka long haduh mynta ka jingpynmih bording ha ka Jylla ka la nang kiew suki-suki.
“Ngi la pynsngew ïa kiba bun ki kam kiba lah ban ïarap da ka Ministry. Baroh kine ki kam ki la ïaid bad ngi pynkhreh ban kyntiew kyrdan ha ka jingpynmih bording, ka jingdon nongtrei bad kiwei-kiwei kynthup ka jingkyntiew ïa ki rukom treikam ha shwa ba ngin poi sha u 2035,” la ong u Mondal.
