Shillong, Jymmang 14
Hadien ba ka la don ka jingïakren pynbeit bad ïasngewthuh jingmut, la plie biang ïa ka Sub-Centre kaba don ha Umjaraiñ, ïa kaba la khang tala shipor da ka Federation of Khasi & Jaiñtia People (FKJGP) South West Khasi Hills District dang ha kane ka taïew ba la dep.
Katkum ka khubor la ong ba ka FKJGP hadien ka jingïakren bad ïa pynbeit bad u Joint Director ka Health Services (MI) Shillong lem bad u DMHO ka South West Khasi Hills District, ha ka sngi Balang ka 14 tarik u Jymmang, 2025 ha ryngkat ka jingdon lang ki trai jaka bad ki bor pynïaid shnong ka shnong Umjaraiñ, la phah plie biang ïa ka Sub-Centre kaba don ha ka shnong Umjaraiñ.
Lah ban pynkynmaw ba ka FKJGP ka la khang tala ïa kane ka sub-centre ha ka 10 tarik u Jymmang 2025 na ka daw ka jingbym lah ka Sorkar lyngba ka tnat ka koit ka khiah ban thung kam pura noh ïa ka Kong Shidalin Lyngkhoi kaba dei trai jaka kaba ki la ai sngewbha sha ka Sorkar ban tei ïa ka Health Sub-Centre naduh u snem 2010 ha ryngkat ka jingïateh soskukar.
U Bah Kenesjune L Nonglait, President ka FKJGP South West Khasi Hills District haba kren sha ki lad pathai khubor u la ong ba ka seng kan ym shong kli kti bad kan ïai buddien ïa kane ka kam wat hadien ba na ka liang ki bor bahalor ka tnat ka koit ka khiah ki la kular ba kin leh eiei noh ïa ki trai jaka.
