Shillong, Jymmang 14
Ha ka jingleit jngoh ha ka sien kaba nyngkong eh ïa ka shnong Sanmer kaba don ha Upper Shillong, u Myntri Rangbah ka Jylla, Conrad K. Sangma ha ka sngi Balang u la ai sngewbha da ki tiar ïalehkai kriket sha ki kynhun ïalehkai kriket kane ka thaiñ.
Kine ki kynhun ïaleh-kai ki long ka Sanmer, Sawmer Cricket, ½ Cric-ket Team, Mawklot bad ka Umlyngka Cricket Team. Ïa kane ka prokram la pynlong da ka Sanmer Sports, Social, and Cultural Club.
Na ka liang u Sangma u la ïoh ban shong jingïa-lang bad ki khynnah ïaleh-kai kriket ha ka por ba u leit ïaid kjat (trekking). U la sakhi ïa ka jingieit jong ki samla kane ka thaiñ ïa kane ka jingïalehkai bad u la ithuh ïa ka jingdonkam jong ki ïa ki tiar kiba kham bha, ha kaba u la kular ban ai jingkyrshan ïa ki lyngba ki tiar ïalehkai.
Ha ka jingkren jong u Myntri Rangbah u la ban jur ïa ka jingdonkam ban pynheh pynsan ïa ki samla bad ban ai ïa ki lad ki lynti ban paw ha ki jingïalehkai bad kumjuh ha ka put ka tem. “Ym don kaei kaei kaba ai jingsngewhun ïa nga kham bun ban ïa kaba ïohi ïa ka bor bad ka jingsngewtynnad ha ki samla jong ngi,” u la bynrap da kaba pynpaw ïa ka jingangnud jong ka sorkar ban thaw ïa ki lad ki lynti ban kyntiew ïa ki.
U la pynbna ruh katto-katne ki jingthmu ba kongsan na ka bynta ki nongshong shnong jong ka Sanmer. Kine ki kynthup ïa ka tynghung jingpynbna (PA system), ka jingïarap pisa na ka bynta ka Sanmer Sports and Cultural Club, bad ka jingkular ban kyrshan ka jingtei ïa ka Community Hall bad ka jaka pynlang um.
Na ka liang u Bah Daniel Thangkhiew, Politi-cal Secretary jong u Myntri Rangbah ka Jylla ha ka jingkren u la pynpaw ka jingai khublei ïa ka jingïalam jong u Conrad Sangma uba la trei shitom ban wanrah ka jingïajan bad ki briew ha kylleng ka jylla da kaba kdew ïa ka jingkwah jong u ban leit sha ki bynta bapher bapher jong ka Jylla ban sngewthuh halor ki jingeh jong ki paidbah.
