Shillong, Jymmang 14
U Myntri ka Sorkar Jylla uba dei u MLA ka UDP na Khliehriat, Bah Kyrmen Shylla, u la ong ba dei ban don da ka rynsan pynsngew paidbah bad ieh ha ka rai ki paidbah ha kaba ïadei bad ka jingpynïasoh lynti rel ha ka thaiñ Jaiñtia.
“Nga don ka jingsngew ba lada ki paidbah ki kwah shisha ïa ka lynti rel, ka dei ban urlong bad lada ki paidbah ki pyrshah balei ngin leh pyrshah ïa ki. Baroh ka dei na ka bynta ki paidbah, ngim dei ban leh kaei kaba long pyrshah ïa ki paidbah,” la ong u Bah Kyrmen haba kren ha ka Sngi Balang.
Haba kylli halor ka rel kit mar, u Myntri u la ong ba ki paidbah ki tip kaei ka rel kit mar bad kaei ka rel kit briew.
“Hangno ngi bakla, balei ki paidbah ki pyrshah ruh ngim tip. Nga ngeit ba ha kawei ka sngi kan sa don ka rynsan ban ailad la kumno-kumno ïa ki paidbah ba kin rai. Ha nga shimet nga kwah ïa kata,” u la ong.
Haba pynpaw ba u Bah Kyrmen um lah ban rai ïa kane ka kam, u la ong ba ka long kaba donkam ïa ka Sorkar Jylla ban pynlong ïa ka jingpynsngew paidbah ka ban dei ka rynsan ïa ki paidbah ba kin pynpaw ïa ki jingsngew bad ki jingai jingmut halor ka jingtyrwa pynïasoh lynti rel ha East Jaiñtia Hills.
“Ailad ïa ki paidbah ban rai ïa kane ka kam ha kata ka rynsan, lada ki paidbah ki ong ‘Em’ ïa ka lynti rel ha kata ka sngi hi dei ban pynkut syndon (full stop) ïa ka kam ba ïadei bad ka lynti rel, bad lada ki paidbah ki ong ‘Hooid’, balei yn kyrshan tang ka Sorkar? Balei ym kyrshan lang ki seng bhalang, ki paidbah lang baroh?,” la ong u Bah Kyrmen.
Haba pynpaw ba lada wan ki kompani thymmai ban buh karkhana ha kano-kano ka thaiñ, ka ju don shwa da ka jingpynsngew paidbah, balei ym leh lang ïa kane ka mat lynti rel ruh ba ki paidbah kin rai?
“Ngi la ïoh ïa ki jingpynsngew bapher-bapher, ki jingai jingmut bad ki jingkynthoh halor kane, hynrei uba bun paid hi un jop haba kut,” la ong u Myntri.
