Nongpoh, Jymmang 14
Ka Synjuk jong ki Rangbah Shnong Raid Sohkhwai kaba kynthup ïa ki hynñiew tylli ki shnong, kita ka Sohkhwai, Nongtyrlaw, Umdu, Kpep Syiem, Umladoh, Umsohme bad ka shnong Umden La-ang ha ryngkat bad ki samla shnong ha ka sngi Balang ki la shong jingïalang kyrkieh halor ka jingïaid sahuh bad laitlan jong ki trok kit rnga, kit dewïong bad kiwei kiwei de kiba kit palat pud lyngba ka surok na Umdu ban mih sha Pahammawlein 20 Mer.
Ki Nongïalam jong katei ka Synjuk ba kynthup ïa u Bah Bristar Sylliang, Chairman, u Bah Shanbor Rani, General Secretary lem bad u samla Aibankitbok Sylliang uba la mih-khmat na ka liang ki samla, haba kren sha ki lad pathai khubor, ki la pynpaw ïa ka jingsngew-khia jur halor ka jingïoh ïaid sahuh ki trok kiba kit palat pud bad buh jingma ïa ka surok.
Kitei ki Nongïalam ki la kynnoh ruh ba lada kitei ki trok kit khia haduh 50-60 ton, kiba kham bunsien la ïohi ba ki mih tang ynda la sdang dum, ki dei kiba kit beaiñ ïa u rnga, dewïong bad kiwei kiwei de khlem ki kot ki sla kiba biang, namar jin lada ki biang ïa ki kot ki sla, ki la dei ban ïaid beit na ka surok bah National Highway 6 bad ym ban rung bad pynjot ïa ki surok shnong.
Ki la pynpaw ruh ba kane ka jingrai ban pyrshah ïa kitei ki trok kiba kit palat, kam dei satia ba ki bishni ïa ka kamai kajih jong katto-katne ki ‘riewshimet kiba don bynta ha katei ka kam, hynrei namar kane ka jingïaid jong kine ki trok kiba kit palat pud kam ïahap shuh bad ka surok kaba la shna. kKumta kum ki nongïalam shnong kiba peit ïa ka bha ka miat, ka khia ka shon jong ka shnong ka thaw, kim lah ban shu peit tang ka khmat, hynrei ban mih shakhmat bad leh ïa kaba donkam na ka bynta ka jingbha lang jong baroh ki paidbah ka thaiñ.
Kumba ïa katei ka surok shnong la dep ban shna pynbha ha kine ki khyndiat por ba la dep lyngba ka skhim PGMSY, na ka liang ki nongïalam shnong ki la pynpaw lada kane ka surok kan jot biang lashai lashisngi namar ka jingïaid sahuh kitei ki trok kiba kit palat pud, ka jingeh kan dei ïa ki bad ki paidbah hi baroh lada ka surok kan jot biang.
Na ka liang kitei ki nongïalam, ki la rai ruh ban leit ujor bad ai da ka jingthoh sha u Deputy Commissioner jong ka Ri Bhoi District halor kane ka bynta, khnang ba na ka liang ki bor pynïaid district kin shimkhia ban teh lakam ïa kane ka jingïoh ïaid sahuh ki trok kiba kit palat pud bad kiba pynjot ïa ka surok ha kane ka thaiñ.
Halor kane ka bynta, kitei ki nongïalam ki la maham tyngeh ba naduh kane ka sngi bad shakhmat, kin nym shah shuh ïa ki trok kiba kit kit palat pud ban rung lyngba ka surok na Umdu bad mih sha Pahammawlein bad lada dang don kino kino kiba leh pyrshah ïa kane ka jingpynbna, na ka liang jong ka Synjuk lem bad ki samla kin nym shim ïa ka jingbah khlieh lada jia eiei kaba sngewsih.
