Shillong, Jymmang 14
Ka United Democratic Party (UDP) kaba dei ka seng kaba synrop lang ha ka Sorkar MDA-II ka la pynpaw ba kan sa rai lada kan ïashim bynta ne em ha ka All Party Committee (APC) kaba la thung da ka Sorkar Jylla ban ïasyllok halor ka jingdonkam ïa ka lynti rel.
U Vice President ka UDP uba dei ruh u MDC, Bah Titosstarwell Chyne u la ong ba ka UDP haduh mynta kam pat rai la kan ïashim bynta ne em ha ka APC, hynrei u la kren shai ba ka UDP haduh mynta ka dang ïeng pyrshah ïa ka lynti rel.
“Ka nongrim jong ka UDP ka shai bha. Haduh mynta ka sngi ngi pyrshah ïa ka lynti rel, namar haduh mynta kim don satia ki lad ïada ne ki aiñ ba pyrkhing ïa ka jingïoh rung pathar ki briew na shabar. Nga ong biang ba haduh mynta ka sngi ngi ïeng beit ha ka nongrim ba ngi pyrshah ïa ka lynti rel,” u la ong.
Ha kaba ïadei bad ka jingdon bynta ha ka All Party Committee (APC), u Nongïalam ka UDP u la ong ba ka seng kan ïakynduh ha ka taïew ban wan ban shim rai la kan don bynta ne em ha kata ka APC.
“Ngin shim rai kum ka seng, namar ym lah ban shim rai tang u President, u Working President lane u General Secretary. Ïa kane ngin sa shim rai ha ka taïew ban wan kum ka seng,” u la ong. Lah ban pynpaw ba ka Voice of the People Party (VPP) kaba don ha ka Liang Pyrshah, ka la kyntait ban leit ïashim bynta ha ka jingïalang ka APC ban ïakren ïa ka jingpynïasoh lynti rel halor kajuh ka nongrim ba la pynpaw da ka UDP kat bym pat don ki lad jingïada na ka jingwan tyllep ki briew ba nabar. Katba ka Congress ruh ka la pynpaw ïa ka jingpyrshah halor ka nongrim ba kiwei pat ki mat ba donkam ka Sorkar kam ju thaw ïa ka APC ne ïasyllok bad kiwei ki seng, pynban ka la shu rai hi.
