Shillong, Jymmang 14
U MDC ka Laban – Mawprem, Bah Ricky Shullai, u la ong ba kam myntoi shuh ban ïoh ne pan skhim lada ka Sorkar Pdeng kam ithuh ïa u pud jong ka KHADC ha ka jingpyntreikam ïa ka skhim Rural Local Bodies ba la bei da 15th Finance Commission ha ki konstitwensi sor lyngba ka Ministry of Panchayati Raj.
Na ka liang u MDC shimet ba mihkhmat ïa ka konstitwensi sor u la ïakynduh ïa u Symbud Myntri Rangbah ka Jylla ba khmih ïa ka tnat District Council Affairs (DCA) ha ka sngi Balang ban pynsngew ïa ka jingeh namar ka jingbym ithuh shuh ka Sorkar Pdeng ïa ki MDC konstitwensi ba don ha sor.
U Bah Ricky u la ong ba da ka jingpyntreikam mynta ïa ka portal bun ki jaka ba hap ha ki konstitwensi sor kim ïoh shuh ïa ka jingithuh na ka sorkar pdeng ban ïoh ïa ki skhim.
Haba pynpaw ba ïa kane ka phang u la rah ban ïakren ruh ha ka dorbar jong ka district council, u la ong, “Nga la dep ban rah ha ka dorbar ba la dep halor ka jingbym ithuh bad ka jingbym shem jong ka portal jong ka Sorkar Pdeng ne ka ‘geotagging’ ba ki ong mynta, ngi ïohi mynta ba bun ka skhim kaba wan khamtam na ka 15th Finance, ngi kiba hap ha sor ngim ïoh ïa ka skhim. Nga lei baroh kawei ka konstitwensi ngam ïoh skhim shuh namar ba dei tang ka Lawsohtun kaba hap sha nongkyndong.”
U la ong ba ka jingïakynduh jong u ïa u Symbud Myntri Rangbah kam dei eh halor ka skhim, hynrei kaba kongsan ka long ba wat la ki district council ki la ïoh ïa ka jingithuh na ka Riti Synshar jong ka Ri, pynban ka portal ba wanrah da ka Ministry of Finance kam ithuh satia.
“Ha kato ka portal ïa ka panchayat ka ithuh bad ka lah ban bat da ka portal ïa ka municipal bad ruh ïa ka rural. Hynrei, hangne pat ba ngim don ïa ka panchayat bad ngim don ward member ngi don da ka Sixth Schedule, ïa ngi pat ka portal kam kem bad kumta kum ki MDC ha sor ngi shem jingeh ban ïoh ïa ka skhim na ka 15th Finance,” la bynrap u MDC.
“Ngi jop ïa ka ilekshon MDC ban ïada ïa ka khyndew ka shyiap ïa ka riti dustur bad ka khaïi-pateng. Kumta, ka jingwan jong nga ka long ban ïoh shwa ïa ka jingïada bad ka jingithuh na ka sorkar pdeng bad sa shim pat ïa ka skhim hadien,” u la ong.
U Bah Ricky u la ïathuh ba u la kyntu ïa u Symbud Myntri Rangbah ban thoh sha ka Ministry halor kane bad pynpaw ruh ka jingkyrmen ba u Symbud Myntri Rangbah un shim khia.
