Mawkyrwat, Jymmang 14
Ki bor shnong jong ka shnong Auro, Demnar bad Mariem ha ka miet jong ka 13 tarik u Jymmang 2025 ki la ïoh ban kem ïa ki saw ngut ki snar nongtuh kiba la suba ba ki dei kiba ju mlien ban tuh ïa ki masi, blang, syiar, dewbilat, pipe um bad kiwei kiwei.
Katkum ka tyllong khubor na ki pulit la ïathuh ba ki bor shnong ki la ïoh ban kem ïa kine ki briew na ka shnong Demnar najan ka ïingmane Balang U Blei ha ka por kumba 8:30 eiei. Kitei kiba la shah kem ki long u Denling Wanniang, 40 snem na ka shnong Sohpian, West Khasi Hills, u Bankitskhem Paliar, 24 snem na Demnar, u Julian Thongnibah, 30 snem na Mariem bad u Jonas Thongnibah, 29 snem na Mariem, South West Khasi Hills District.
Shuh shuh ka tyllong khubor ba la ïohlum ka ïathuh ba kine ki briew ki dei kiba la shah thwet ha ka shnong da ki bnai namar ka jingsuba tuh masi tuh blang tangba ym ju lap ksai eiei. Dei ha ka miet jong ka 13 tarik hadien ba la ïoh kem bad tohkit, kitei ki briew ki la phla ba ki dei kiba ju mlien ban leh ïa kitei ki kam.
Shuh shuh, la ïathuh ruh ba kitei ki briew ki la byrngem ruh ïa u Acting Syiem ka Hima Nobosohphoh bad ki la kam ruh ba ki don sa lai ngut kiba donkti ha ki kam tuh.
Ïa kitei saw ngut, ki lai shnong ha ka sngi ba bud ki la aiti noh sha ki pulit ka Mawkyrwat bad ki la ujor ruh da ka ejahar pyrshah ïa ki.
