Shillong, Jymmang 14
Kawei ka samla ba dang 21 snem ka rta na ka Jylla Meghalaya, kaba pule B.Sc Nursing ha Regional Institute of Medical Sciences (RIMS), Imphal, ha ka Sngi Ba-ar la lap ba ka la khlad noh hadien ba la suba ba ka la sdien phasi ha ka kamra hostel ba ka sah.
Kane ka samla kaba dei na rilum Garo ka dei kaba pule ha ka fourth semester, bad hadien ba ka khlem poi sha klas ka la pynlyngngoh ïa ki paralok ba pule lang bad ka, bad kaba la pynlong ïa ki ban leit wad sha hostel.
Katkum ka tyllong khubor la ïathuh ba ha ka step Sngi Ba-ar kane ka samla ka khlem poi sha klas ha ka por ba khot kyrteng (roll call) kumba ju leh ha ka por mynstep. Namar kane ka jingbym shym don jong ka, kiwei ki para ba ïa pule lang ki la lyngngoh bad leit wad ïa ka ha kamra, bad hadien ba kam shym la thie, na ka liang ki bor pynïaid katei ka jaka pule ki la pyntip noh sha ki bor ba halor.
La ïathuh ba ka kynhun ki pulit na thanat Lamphel ryngkat ki briew ka Manipur Forensic Sciences Department ki la poi ha katei ka jaka ban tohkit, bad la pynkit noh ïa ka met jong ka sha ka jaka buh met ïap ha RIMS ban leh ïa ka post-mortem.
Katkum ka tyllong khubor la ïathuh ba ha ka jingtohkit ba la leh hashen, la suba ba katei ka samla ka lah ban shim hi ïa la ka jingim, katba na ka liang ki bor pulit ki la pyntip ba ïa ka daw ba thikna jong ka jingïap yn sa lah ban tip hadien ba leh ïa ka ‘autopsy’.
Na ka liang ki pulit ki la pynrung mukotduma halor kane ka jingjia bad ka jingtohkit kaba bniah ka la ïaid.
