Shillong, Jymmang 14
U nongïalam ka TMC, Richard Marak, u la ong ba ki kynrum-kynram bad ki jingeh ba la mih na ka eksamin Common University Eligibility Test-Under Graduate (CUET-UG) ka dei ka kynrum-kynram ba la thaw ne shna hi ne ka “manufactured mess”.
U la pynpaw ïa ka jingsngewkhia kaba khraw ba ha ka snem kaba lai lynter, ki samla pule na Meghalaya ki mad ïa ka jingeh namar ka jingbym lah jong ka Sorkar Jylla ban pynbiang ïa ki jaka thoh eksamin CUET-UG hapoh ka Jylla.
“Ki samla pule na baroh lai tylli ki jaka kata napoh Khasi-Jaiñtia bad Garo Hills ki la ïoh biang sa shisien ïa ki jaka thoh eksamin jong ki sha ki jaka ba kham sha jngai kum ha Jorhat, Dibrugarh, Mizoram, Nagaland, bad wat ha Kolkata, kaba wanrah ïa ka jingeh kaba khraw ha ka liang ka pisa tyngka, ka met, bad ka jingmut jingpyrkhat ïa ki longïing, khamtam ïa kito kiba wan na ki nongkyndong bad kiba tlot ha ka liang ka ïoh ka kot. Kane kam dei ka jingeh kaba kynsan-kynsan, hynrei ka dei ka jingbym lah bad ka jingdkoh treikam kaba la tip lypa kaba ju jia manla ka por”, ong u Marak.
U Marak u la kynthoh ïa ka Sorkar namar ka jingbym don ïa ka jingthmu bad ka jingbym lah ban long ki nongïalam.
“Katba ka rukom ai pisa jong ka National Testing Agency ka la ïarap ïa kine ki jingeh, ka Sorkar ka la tip thikna ïa kaei kaba donkam. Ha ka jaka ban thmu lypa, u Myntri pule-puthi mynta u ïaleh ban thoh sha ka NTA hadien ba la dep ban ai pisa. Ka dei ka jingpyrkhat hadien, ym ka jingïalam”, ong u Marak.
U Marak u la buh jingkylli ruh ïa ka jingkyrpad paidbah jong u Myntri Rangbah ka Jylla sha u Myntri Pule Puthi jong ka Sorkar Pdeng, da kaba ong ba ka “lah ban paw ba ka long kaba shimkhia, hynrei kam leh eiei ban buhrieh ïa ka jingshisha: kane ka Sorkar ka jubab ïa ka ding kaba ka la kyntait ban pynlip haba ka la ïoh lad”, bynrap u Marak.
Ka jingkam jong u Myntri ka tnat pule puthi ba la ithuh sa 200 tylli ki node ba la pyndap bad la phah sha ka Tata Consultancy Services ban jurip ka long kaba “pdiang sngewbha, hynrei kaba duna palat, kaba la slem palat”, la ong u Marak. “Balei ym shym la buh hakhmat eh ïa kane ha kaba sdang jong u snem, shwa bha ban ai pisa eksamin? Balei ban ap ïa ki samla pule ban shah shitom shwa ban leh eiei?”
U Marak u la ban jur ba ka jingpynbeit ka donkam ïa ka jingthmu ba kongsan, ka jingïatreilang ha ka por kaba biang bad ka NTA, ka jingpynkhreh kloi ïa ki jingdonkam, bad ka mon saiñ pyrthei.
“Ka Sorkar ka dei ban thaw ïa ka kynhun treikam kaba kyrpang haduh u bnai Jylliew 2025 ban pynthikna ba ki jaka thoh eksamin CUET-UG kin long kiba biang bad khnang ba kan wanrah jingsuk ruh na ka bynta ki khynnah kiba thoh eksamin ha u snem 2026.”
U Marak u la pynkut da kaba ong ba ka jingbym lah jong ka Sorkar MDA ban weng ïa ka jingeh ha ka eksamin CUET-UG ka pynduh ïa ki lad ki lynti jong ki samla pule ka Meghalaya.
“Kane kam dei tang ka jingduna; ka dei ka jingbym lah kaba don jingma kaba khraw. Ka Meghalaya ka dei hok ban ïoh ïa kaba kham bha ban ïa ka Sorkar kaba kyndit bynriew tang ynda la dier ka por”, ong u Marak.
