Shillong, Jymmang 14
Ka Executive Body jong ka Meghalaya College Principals’ Council (MCPC) ha ka Sngi Balang ka la kyntu ïa ka North Eastern Hill University (NEHU) ban khot noh ïa ka Academic Council khnang ban pynbeit ïa ki katto-katne ki mat ba sahteng haba ïadei bad ka pule-puthi.
Ka NEHU ka dei tang ma ka marwei ka skulbah ha kaba ki shlem pule ki pynïasoh hapoh ka Jylla bad ka khmih ïa kumba 85 tylli ki shlem pule (kiba pynïasoh) bad jan 75,000 ngut ki samla pule.
Haba pynpaw ïa ka bynta ba kongsan jong ka NEHU ha ka liang ka pule-puthi jong ka Jylla, ka MCPC lyngba ka kyrwoh ka la ong ba ki mat kum ka jingai jingmynjur halor ka jingpynïasoh bathymmai bad jingpynthymmai ïa ka jingpynïasoh (ba la don lypa), ka jingpynkylla ïa ki kyndon ba ïadei bad ka jingpynïasoh bad ki kyndon ban pynïahap bad ka saiñdur NEP 2020, ka jingmynjur ïa ki ‘Syllabi’ jong ka snem ba saw jong ki prokram UG bad kiwei, dei ban pynbeit noh kloi.
Ka MCPC ka la kyntu jur ba dei ban khot noh ïa ka Academic Council jong ka NEHU khlem da pynslem shuh bad ka la kyntu ïa baroh ki bor ba dei khmih bad ki nongshim bynta ban shimkhia ïa kine ki jingeh da kaba buh hakhmat eh na bynta ka jingmyntoi ka lawei ha ka pule-puthi jong ki hajar ngut ki samla pule ha kylleng ka Jylla.
Na ka liang ka Council ka la ïaroh ruh ïa katto-katne ki sienjam ba la shim da ka NEHU, kum ka jingpynneh ïa ka jingtreikam jong ka tnad Eksamin wat hapdeng ki kynrum-kynram hapoh ka skulbah.
Ka tnad ka la seisoh ha ka ban pynlong ïa ki eksamin ‘Undergraduate Odd Semester’ ha u bnai Naiwieng-Nohprah, 2024, bad kane ka kynthup ruh ïa ka eksamin ka banyngkong eh na ka bynta 26 tylli ki ‘Vocation Training Course’.
Shuh shuh ka la ai khublei ïa ki jingpyrshang jong ka tnad na bynta ka rukom treikam kaba shimkhia ha ka ban ïatreilang bad ki kolej ba pynïasoh bad ban weng ïa ki jingeh kiba ïadei bad ki MOOC, ban shna ïa ki kyndon ‘Internship’, bad kiwei-kiwei ki mat kiba kongsan.
