New Delhi, Jymmang 14
U Purnam Kumar Shaw, shipai Border Security Force (BSF) uba la shah bat ha ki shipai Pakistan Rangers hadien ba u la kum leit jam bakla sha shiliang khappud bar-ri ha u bnai ba la dep, la aiti noh ïa u sha ki bor pynïaid ka India ha ‘Check-Post’ ha Attari ha ka Sngi Balang.
“Mynta ka sngi, ïa u shipai BSF, u Purnam Kumar Shaw, uba la don ha kti jong ki shipai Pakistan Rangers naduh ka 23 tarik u Ïaïong, 2025, la aiti noh sha India ha ka por kumba 10:30 baje lyngba ka Joint Check Post Attari, Amritsar. Ïa kane ka jingaiti la pynlong da kaba suk bad katkum ki kyndon ba la pynskhem,” ong ka BSF ha ka kyrwoh khubor.
Utei u shipai BSF (40 snem ka rta), uba la shah bynshet kam ha Firozpur, Punjab, u la kum leit jam bakla sha shiliang khappud ha ka 23 tarik Ïaïong, shisngi hadien ka jingthombor kaba shyrkhei ha Pahalgam, Jammu & Kashmir, kaba la ïalam sha ka jingshah pynïap jong 26 ngut ki briew ba lui-lui. Ka jingshah thombor ha ki lehnoh ka la nang pynjur ïa ka jingïakynad ha khappud naba ka jingwanphai jong u ka la slem.
Namar ka jingïakynad ha khappud, ka Pakistan kam shym la jubab ïa ki jingkyrpad ban pynlong jingïalang na bynta ban pyllait noh ïa u Shaw, la ong ki heh ophisar.
“Ka Pakistan kam jubab namar ka jingïakynad kaba dang bteng hadien ka jingshah thombor ha Pahalgam, hynrei ngi la ujor ïa ka jingpyrshah jong ngi sha ki Pakistan Rangers bad ngi dang pyrshang katba lah ban wan ïalam biang ïa une u shipai,” la ong uwei u ophisar, katkum ka khubor jong ka ANI.
U Purnam Kumar Shaw, u don ha ka uniphom bad u la rah ruh ïa ka suloi shakri jong u ha ka por ba u la kum jam bakla sha Pakistan. Une u rangbah ba 40 snem ka rta u la don bad ka tnad shipai BSF la 17 snem mynta. U dei na Hooghly, West Bengal.
Hadien katto-katne sngi ba la bat ïa u ha Pakistan, ka kurim u Shaw, ka Rajani hapdeng ka jingarmet, ryngkat bad u khun uba dang 7 snem ka rta lem bad kiwei-kiwei ki bahaïing, ki la her da ka liengsuiñ sha Chandigarh. Ka la ong ba kan leit ruh sha Ferozepur ban ïoh jingtip shuh-shuh halor ki jingpyrshang ban pynphai biang ïa u kurim jong ka.
Ka Myntri Rangbah ka West Bengal, ka Mamata Banerjee, ka la pynpaw ka jingsngewkhia halor une u shipai BSF.
“Kane ka dei ka jinglong-jingman kaba sngewsih haduh katta-katta. Nga kwah ba yn pyllait im noh kloi katba lah ïa u,” ka la ong.
Hadien ba la pyllait ïa u, ka Myntri Rangbah ha ka rynsan lad pathai ‘X’ ka la ong, “Nga sngewkmen ban ïoh jingtip ba u Purnam Kumar Shaw jong ngi, u shipai BSF, u la shah pyllait noh. Nga la kynjoh ktien baroh shi katta bad kiba haïing hasem jong u bad nga la ïakren la lai sien bad ka kurim jong u hangne ha Rishra, Hugli. Mynta ka sngi ruh nga la phone ïa ka. Baroh ki jingkyrkhu-jingkyrdoh na bynta u shipai uba kum u hynmen-para jong nga, ka ïing ka sem jong u baroh kawei kynthup ïa ka kurim jong u, ka Rajni Shaw.”
Ha ryngkat ka jingsngewhun na ka jingwanphai biang jong u kurim jong ka, ka Rajani Shaw ka la ong, “Nga ai khublei ïa baroh kiba la kyrshan ïa nga. Ka ri ka la don ryngkat lang bad u. Ka Myntri Rangbah ka Jylla ka la kynjoh ktien ïa nga bunsien bad ai jingkyrmen ïa nga. Nga ai khublei ïa ka.”
