Shillong, Jymmang 14
Ka lympung ïalehkai Indian Premier League (IPL) kan bteng biang naduh ka sngi Saitjaiñ bad ïa ka final yn pynlong ha ka 3 tarik u Jylliew, la pynbna da ka Board of Control for Cricket in India (BCCI) ha ka Lah Sngi U BLei.
Ïa kane ka lympung la pynsangeh ha ka 9 tarik mynta u bnai na ka daw ka jingïakynad hapdeng ka India bad ka Pakistan, hynrei mynta yn pynlong ha ki hynriew tylli ki jaka ïalehkai, katba ïa ki jingïalehkai play-off yn sa shim rai hadien.
Naduh ba ka India bad ka Pakistan ki la pynbna sangeh ïasiat, ka BCCI ka la shem jingeh ban bteng biang ïa kane ka lympung. Hynrei hadien ka jingïasyllok bad ka sorkar, ka Board ka la pyllait ïa ki prokram ïalehkai ha kaba kane ka lympung kan sdang biang ha Bengaluru ha ka sngi saitjaiñ ha kaba ka Royal Challengers Bengaluru kan ïakhun pyrshah ïa ka Kolkata Knight Riders. Nangta, yn bud sa ar tylli ki jingïalehkai ha ka Sngi U Blei ha Jaipur bad Delhi ha kaba ka Rajasthan Royals kan ïakhun pyrshah ïa ka Punjab Kings ha ka nohphai sngi, bud sa ka jingïalehkai ha ka por janmiet hapdeng ka Delhi Capitals pyrshah ïa ka Gujarat Titans.
