Shillong, Jymmang 14
U MLA ka Jowai uba dei ruh President ka National People’s Youth Front (NPYF), Bah Wailadmiki Shylla u la ong ba lada ka don ka lad ka lynti ban pynlong Nongbah Lyiur ïa ka sor Jowai kumba la dawa Nongbah Tlang ha Tura, un ïakren bad ka Sorkar halor kane ka bynta.
Kane ka jingkren u MLA ka Jowai ka long hadien ba la mih ka jingdawa na ka kynhun sengbhalang ban pynlong nongbah lyiur noh ïa ka Jowai.
Lah ban kdew ba ka Sorkar Jylla ka la thaw ïa ka All Party Committee (APC) halor ka jingdawa ban pynlong Nongbah Tlang (Winter Capital) ha Tura, hadien ba la mih ka jingdawa na ki kynhun bapher-bapher ka rilum Garo.
“Lada long kaba lah ne lada ka lah ban long, balei em. Hynrei, ïa mynta ka shong ruh ha ka Sorkar bad na ka liang jong nga ngam tharai ba nga lah ban kren eiei palat. Ngan kmen pat lada ka long kaba lah,” la ong u MLA ka NPP ha ka Sngi Balang.
Haba kylli, u la ong ba kane ka phang ka dang dei kaba dang shu sdang, bad bynrap ba kum u Nongmihkhmat u hap ban sngap ïa ka jingpynpaw ki paidbah.
“Nga hap ban sngap ïa ka jingpynsngew ki paidbah, ïa mynta ki don tang katto-katne tylli ki sengbhalang kiba la ïakren ïa kane. Kumba nga la ong, kane ka dang dei tang kaba dang shu sdang ïakren, bad hadien lada baroh ki pynpaw ïa kane kajuh ka jingkwah, ngan sa rah ïakren bad ka Sorkar,” la ong u Bah Wailadmiki.
