Paris, Jymmang:
Katkum ki khubor, la ong ba ka khun bad u khun ksiew jong u heh ka Crypto ki la shah rahbor ha ki riew kieng-atiar hapoh Paris ha ka Sngi Ba-ar, ha kane ka sien thmu thombor jong kitei ki kynhun pyrshah ia u heh jong katei ka kompeni ha ka nongbah jong ka France.
Ha katei ka jingjia la ong ba 4 ngut ki riew kieng-atiar kiba la sop bad kah dur ialade, ki la leit ban thombor ia kitei ki shi kurim bad ia u khun jongki ha katei ka nongbah Paris jong ka France, ha kaba kitei ki 3 ngut ki la shu lait-im da ka said na katei ka jingjia hynrei baroh 3 ngut ki la mynsaw ha katei ka jingjia bad la pynkit noh ia ki baroh sha ka jakasumar ha katei hi ka nongbah.
Katkum ba la iohi na ka video ba la ioh ring-dur na ka CCTV ba la pyndait ha katei ka jaka, la iohi ba 3 ngut ki runar ki hiar na kawei ka kali ‘van’ bad ki leit ban tan jubor ia katei ka kmie bad u khun shapoh ka kali, ha kaba ki la dep ban shoh bad tied shuwa ia utei u kpa uba pyrshang ban ïakhun bad pyllait im ia ki ha katei ka por.
Ha katei ka por, katei ka longkmie ka ioh ban knieh ia ka suloi na uwei na kitei ki runar bad ka la kawang kham sha pajih, ha kaba ka la lynñiar bad pyrta ban khot jingïarap na kiba don hajan katei ka jaka bad dei ha katei ka por ba kiba don hajan ki la iohsngew bad leit mareh sha katei ka jaka bad kitei ki runar ki la phet bad ieh-noh ia kitei ki 3 ngut tang mar ia iohi ia ka jingwan tur jong ki paidbah sha katei ka jaka.
Katei ka longkmie ka long ka khun jong u CEO bad u nongseng barim ka paymium, kaba long ka kompeni ‘Cryptocurrency’ jong ka France.
Kane ka jingjia ka long ruh hadien ka jingshah rahbor jong u heh ka Crypto- u David Balland bad ka briew jong u, ha u Kyllalyng-kot jong une hi u snem.
