Nongpoh, Jymmang 14
Ka kynhun jong ki pulit ka nongbah East Guwahati Police Department (EGPD) lyngba ka thanat Basistha hadien ka jingtrei shitom kaba la ar taïew tam, ki la ïoh ban lap biang ïa ki mar ki mata kiba shongdor haduh T.43 lak kiba la jah klep ryngkat bad kawei ka trok kaba don ïa u registration number AS12-AC-0874 katba ka dang mih na ka nongbah Guwahati ban leit sha Silchar ha ka 28 tarik jong u Ïaïong, 2025.
Ka tyllong khubor na ki pulit ka ïathuh ba hadien ka jingjah rngai jong katei ka trok ryngkat bad kitei ki mar ki mata, ka la don ka jingujor pyrshah ïa u nongñiah katei ka trok lem bad ka kynhun jong u halor katei ka kam.
Hadien ka jingtohkit kaba jur bad ka jingïoh jingtip kaba thikna, ki pulit ki la ïoh ban kem shwa ïa ar ngut ki briew kiba la suba rahbor ïa katei ka trok na Khanapara ïa kiba la tip kyrteng kum u Ekram Hussain ba ju khot ruh kum u Imran, 22 snem ka rta lem bad u Hafizur Miya, 27 snem ka rta. Na ka jingtohkit ïa kitei ar ngut, ki bor pulit ki la pynlong ïa ka jingkhynra sa ha Saradiya, Barpeta bad hangne ruh la ïoh ban kem biang sa ar ngut kiba la suba donkti, kiba kynthup ïa u Babul Hoque, 27 snem ka rta bad u Jiyarul Islam, 29 snem ka rta.
Na ka jingbuddien jong ki bor pulit, kitei ki mar ki mata kiba la jah rngai, la ïoh biang na kawei ka jaka kaba don ha ka nongbah Shillong ïa kaba la khmih da u Rakesh Kumar Mahato, 33 snem ka rta, katba ïa ka trok la lap noh hajan jong ka Ialong Toll Gate, Jowai kaba la ieh da kitei ki runar.
Ki mar ki mata kiba ki bor pulit kila lap biang ha kane ka jingkhynra, ki kynthup ïa 3 tylli ki klong kiba ngiam 210 litar, 6 tylli ki pakha jong ka kompani Crompton, 283 synduk ki tiar jong ka kompani Marico, 50 borti ka Lubricant Urea, 12 tylli ki jaiñ phong, 2 synduk ki tiar ilektrik, 3 synduk ki tiar ka kompani Dabur, 67 synduk ka Colgate, 5 synduk ki tiar ka kompani 3M bad 5 synduk ki jingdih jong ka umsoh Real Juice. Halor kane ka bynta, ki bor pulit ki la kem noh ïa baroh san ngut kitei kiba briew kiba suba donkti halor kane ka kam bad pyntip ruh ba ka jingmudui pyrshah ïa ki katkum ki kyndon jong ka aiñ ka la ïaid shakhmat.
