Shillong, Jymmang 14
Ka India ka la lah ban pynskhem ïa ka kyrdan ba hakhlieh duh jong ka Group-B ha ka SAFF U19 Championship, hadien ba ka la lah ban pynliem noh ïa ka Nepal da 4-0 kol ha ka miet jong ka Sngi Ba-ar ha Golden Jubilee Stadium.
Kane ka kynhun ïalehkai ka ri ka la lah ban thep mar ar kol ha baroh ar tylli ki wat jingïakhun. U Rohen Singh Chapha-mayum (28′ & 76′) u la thep ar kol, katba ïa ki shi kol la thep da u Omang Dodum (29′) bad u Danny Meitei (84′). Da kane ka jingjop ka India ka la pynkut ïa ka jingïalehkai jong ka Group-B ryngkat 6 poiñ na ar tylli ki jingïakhun bad ïapher pat ha ka kol. Katba ka Nepal pat ka la wan ha ka kyrdan ba ar ryngkat 3 poiñ na ar tylli ki jingïalehkai. Ka India kan pynkhreh ban ïakhun semi final pyrshah ïa ka Maldives, kaba wan ba ar ha ka Group-A ha ka sngi Palei ha ka por 7.30 janmiet, katba ka Bangladesh kaba la lamkhmat ha ka Group-A kan ïakhun pyrshah ïa ka Nepal ha ka por 3.30 janmiet ha kajuh hi ka sngi.
Ha kane ka jingïakhun ka India ka la ïakhun tyngeh naduh kaba sdang. Ka jingïoh ban pynbuh bol da u Malemngamba Singh ka la pynlong ïa u Rohen ban pynkhih jar ha ka minit kaba 28 ha kaba u rangapkol ka Nepal u Bhakta Bahadur Pariyar um shym la lah ban pyllait na ka jingshah thep.
Hadien ar minit ka India ka la pynbud biang ïa ka kol ba ar lyngba u Omang hadien ka jingïalehkai lang bad u Danny ha ka bynta kaba shakhmat.
Hadien katto katne por ba la bteng ïa ka jingïakhun jong ka kylla miet, ka India ka la ïakhun tyngeh shuh shuh ha kaba u Chaphamayum u la thep biang sa shi kol ha ka minit kaba 76. Ïa ka kol kaba saw bad kaba khatduh la thep da u Danny ha ka minit kaba 84 na ka bynta ban pynlong ïa ka India ban ïoh jingjop.
Ha kawei pat ka jingïakhun kaba ar Group-A hapdeng ka Maldives bad ka Bhutan ki la ïasam mar shi poiñ hadien ba ki la ïakhaid mar 2-2 kol ha ka Group-A.
Na ka Bhutan la thep da u Lham Tenzin (44) bad u Chogyel S. Sherab (90+6), katba na ka Maldives la thep pat da u Aidh Moha-med Jaweez (75) bad u Ashham Ibrahim Mohamed (90+3). Te kumta ka Maldives ka la jam sha ka semi-final hadien ba ka la wan ha ka kyrdan ba-ar ryngkat 2 poiñ na ki ar sien ïakhun kata hadien ïa ka Bangladesh, kaba la lam-khmat ha kane ka group.
