Guwahati, Jymmang:
Ha ka sienjam ban pyndonburom ïa ka shispah snem ka jingkha jong u nongrwai rwai u Bhupen Hazarika, ka kynhun Myntri jong ka Assam ka la mynjur ban ai kyrteng thymmai ïa ka kad liengsuiñ ha Dibrugarh ha ka kyrteng jong une u riew pawkhmat jong ka riti dustur.
Ïa kane ka rai la pynbna da u Myntri Rangbah ka jylla u Himanta Biswa Sarma ha ka sngi Saitjaiñ, ha kaba yn khot ïa ka dorbar kyrpang ban mynjur ïa ka rai na ka bynta ban bishar bniah da ka sorkar pdeng.
Nalor kane ka jingai burom kaba kongsan, ka kynhun Myntri ka la ai jingshai ruh ïa ka skhim jingïarap pisa jong ki nongtrei sha Assam, 2025, da kaba ai jingïarap pisa shisien kaba T.5,000 sha kumba hynriew lak ngut ki nongtrei kper sha katba kane ka karkhana ka dang rakhe ïa ka snem kaba 200 jong ka.
Kiwei pat ki rai ba kongsan ki kynthup ïa ka jingmynjur ïa ka skhim pyndap ïa ki tiar shna tiar jong ka Assam, 2025, kaba tyrwa ïa ka jingpyndap 60 percent ïa ki jingai jingkyrshan jong ka sorkar pdeng, bad ka jingpynhiar ïa ka bai pynrung kyrteng ïa ki seng treilang sha ka 0.5 percent.
Shuh shuh, ïa ka ‘Jibon Prerna Scheme’ na ka bynta ki samla pule bad ki nongwad bniah la mynjur ban pyntreikam naduh u bnai Risaw, 2025, kaba ai jingïarap man la u bnai ïa ki samla pule kiba dei hok bad ka jingïarap pisa kaba shisien ïa ki nongwad bniah.
Ka kynhun Myntri ka la mynjur ruh ïa ka bai wai ïing kaba 50 percent na ka bynta ki katto katne ki jait nongtrei bad ban pynjlan ïa ki skhim ‘Apun Ghar’ bad ‘Apun Vahan’ sha baroh ar ki nongtrei ba man ka por bad ki nongtrei kontrak jong ki tnad sorkar.
Khatduh la mynjur ïa ka Assam Pumped Storage Power Generation Promotion Policy, 2025, ban pynlong ïa ka Assam kum ka Pumped Hydro Storage Hub.
