Shillong, Jymmang 14
U Myntri Rangbah ka Jylla, Conrad K. Sangma, ha ka Sngi Balang, u la pynbna ba ka ’39th National Games’ ka ban wan ka ban sa long ha ka Jylla, kan long kaba lait na ka jingpyndonkam plastik.
Ïa kane ka jingkular u Myntri Rangbah u la pynpaw ha ka jingkren dang shen ha Nongpiyur Government LP School, ha kaba u la ïasam ïa ki jingjia ba sngewtynnad haba ïadei bad ka jingpyrshang jong ka Jylla ban ïakhun pyrshah ïa ki jaboh plastik.
U Myntri Rangbah u la leit jngoh ïa katei ka skul bad ka thaiñ ban jurip ïa ka paiñkhana kaba la shna da ki plastik kiba pyndonkam tang shisien lyngba ka S.U.P.E.R CAMPAIGN 2024 (Single Use Plastic Eco Recycling) kaba dei ka jingsdang jong ka ‘My Meghalaya My Pride & GreenAmmo’ ha ryngkat ka jingïatreilang bad ka Directorate of School Education & Literacy bad ka State Project Office SEMAM-Samagra Shiksha, jong ka Sorkar Jylla.
U Myntri Rangbah halor ka jingthmu kaba kham heh u la pynbna ïa ka jingbei tyngka kaba kumba T.1890 klur ha ka karkhana jong ka buit stad thymmai ba mynta ka ban pynmih ïa ki pla ba la shna na u ‘Starch’ bad wat ïa ki bilor kumjuh.
Kine ki lad ban pynlong sboh ki thmu ban bujli ïa ki plastik ba ju pyndonkam, kaba pyni ïa ka sienjam kaba kongsan ha ka ban pynneh-pynsah ïa ka mariang.
“Ka thong jong nga ka long ba ha ka ‘National Games’ dei ban pyndonkam pura da ki mar kiba lah ban pyut,” la ong u Myntri Rangbah ka Jylla, da kaba ban jur halor ka jingdonkam ba kyrkieh jong kane ka jingthmu.
Ka National Games ka ban wan ka long kum ka bynta kaba kongsan haba ïadei bad ka jingkitkhlieh jong ka Meghalaya ïa ka mariang.
Da kaba bei tyngka ha kiwei pat ki lad kiba lah ban pyut kumjuh ban kyrshan ïa ki buit bathymmai na bynta ban pyndonkam biang ïa ki mar, ka Jylla ym tang ba ka thmu ïa ka lympung ïalehkai kaba jop hynrei ka buh ruh ïa ka nuksa kaba khlaiñ sha ka ri baroh kawei ban pdiang ïa ki rukom treikam kiba lah ban pynneh-pynsah.
Ka kompeni kaba don bynta ka la dep ban pynlong ïa ka jingwad bniah bad ka da thrang eh ban pynïeng ïa katei ka karkhana ha ka Jylla, ha ryngkat ka jingpan jingkyrshan na ka Sorkar – ka projek kaba u Myntri Rangbah ka Jylla u kyrshan pura.
Kane ka jingthmu ka buh ïa ka Meghalaya kum ka Jylla kaba nyngkong eh ha ka ban pdiang ïa kum kine ki lad ki lynti kiba lah ban pynneh-pynsah.
Haba kubur ïa ki jyrwit-jyrwat haba ïadei bad ka jingkhang pura ïa ka plastik, kaba kynthup ym tang ïa ki pla hynrei haduh ki tiar kum ki jingsong ‘Chip’ bad ‘Chocolate’, u Myntri Rangbah u la ban jur halor ka rukom treikam ha la ki jong ki jong ki kylla, da kaba pynpaw ïa ka jingdonkam jong ka jingïadon bynta lang ka imlang-sahlang ha ryngkat ka jingïarap jong ka Sorkar.
Na ka liang u Myntri Rangbah u la ai ruh ka jingkular ban thied ïa ki tiar tem na ka bynta katei ka skul.
