Shillong, Jymmang 14
Ki nongshong shnong jong ka Dong Mihsngi ha ka shnong Bataw ki la leit ban aiti da ka dorkhas sha u Myntri ba dei khmih ïa ka tnat bording, u AT Mondal ban kyrpad kyrkieh ban pynïasoh bording ha ka shnong Dong Mihsngi Bataw, East Jaiñtia Hills.
Ha katei ka dorkhas ba la soi da u President, Bah Ajoymeson Lyngdoh bad u Secretary, Bah Barister Suchiang, ki nongshong shnong ka Dong Mihsngi jong ka shnong Bataw ki la pynpaw ba katei ka shnong kam don bording, bad kane ka la ktah jur ïa ka jingim ba man ka sngi jong ka imlang sahlang khamtam ha ka por janmiet bad mynmiet.
Ki nongshong shnong ki la pynpaw halor ka jingïakynduh jingeh kaba shikatdei eh namar ka jingbym don bording kaba kynthup ïa ki jingeh ha ka jingim ba man ka sngi ha kaba ki khynnah skul ki shem shitom ban pule kot ha ka por miet, bad ki longïing-longsem ki shem jingeh ban pynkhreh ïa ki jingbam bad ban pyndep ïa ki kam ba man ka sngi. Shuh-shuh, kitei ki nongshong shnong ki la pynpaw ruh ka jingeh haba ïadei bad ka jingktah ha ka ïoh ka kot ha kaba ki la ong ba ka jingbym don bording, ka khanglad ïa ki kam kamai jong ki namarba kim lah ban pynïaid ïa ki kam ki jam khamtam ïa ki kam kiba donkam ïa ka bording bad kim lah ban pyndonkam hok ïa ki kam ha ka kam rep jong ki.
Ki la pynpaw ruh ïa ka jingeh haba ïadei bad ka jingshngaiñ halor ka jingbym don ki jingshai ha surok bad ka bording ha ki ïing-ki sem, ka kyntiew ïa ki jingma ha ka jingshngaiñ, khamtam ha ka por janmiet bad miet.
“Ngi kyrpad ïa phi ba phin pyrkhat ïa kine ki mat ba ngi la ai ha phi. Ngi sngewthuh ba ki lah ban don bun tylli ki shnong ha ka Jylla jong ngi kiba donkam kum kine hynrei ngi kyrmen ba phin buh hakhmat eh ïa ka jingkyrpad jong ngi, haba kheiñ ïa ka jingdonkam kyrkieh jong ka thaiñ jong ngi ïa ka bording”, ong kitei ki nongshong shnong.
